تعبت من ممشى على غير مشهاي =وتعبت من صبر على غير غايه
طاحت عزومي لين قلت نواياي =وابعدت من مبداي صوب النهايه
ماغير اهوجس واظرب الراي بالراي =واثر المغربل ما يخلصه رايه
الوقت ذا هو هو بطبعه وانا اياي =انا صدوق وذا الزمان الدعايه
يالله ان تعاونني على كبر بلواي =ويالله ان تقديني طريق الهدايه
اشكي من الماضي وخوفي من الجاي =ولي في ملمات الليالي درايه
لو كنت اعرف دواي ماخفت من داي =اخير من طب الطبيب الوقايه
سبحان من يعرف مقاسيم دنياي =في صفحة ما تنعرض للقرايه
اذا غدا وقتي جزوع من حكاي =ابدي بهاجوسي على كل ايه
واذا كسرني هاجسي صوب مركاي =فايه جبرني نخوة دموعي ايه
وان شفت همي مانقص من تشكواي =اخترت من نطح الهموم القفايه
وقت غدا كنه علي اكبر اعداي =يشمت علي مجمعين الوشايه
صادمت صكات الزمن باول صباي =وصادمت قد شيبي بوجه المرايه
لا الين نبات الارض غارس ورواي =وشوك السلم ماخذ على اسمي وصايه
اعد غلطاتي واحسب خطاياي =لاني بمندلن ولاني بتايه
ايس وتيبس عقب ما أيس شفاياي =واممل وبعض امال قلبي غوايه
لاسوم انا وجهي ولا مد يمناي =ثنتين تحسب للمذله قدايه
بلقي هموم الليالي مقفاي =لين اقلب اخر صفحتن في الروايه
برضى بمقسومي على طيت رشاي =لعاد لي شفن ولالي غوايه
مالي جدا الا ونة القلب ودعاي =وعناية الله ما وراها عنايه
بسكت بسري ساجنه في حناياي =الين تروى مقبلات الحكايه
آخر تعديل بواسطة سيف عبس ، 30-12-2008 الساعة 06:25 PM.
|