هذه القصيده يرثي فيها الشاعر/ فواز البلوي اخوه وصديقه المرحوم بإذن اللهعبدالعزيز البلوي " ابو فهد" في هذه الآبيات الجميله ...اليكم القصيده
يالله ياعالم خفيات الآسرار =رب الملا كل البشر تلتجيبه
عنده خفايا الوقت يدري بما صار= ولافيه احد بالكون يعلم بغيبه
من بعد ذكره بالبكاء طحت منهار =ببكي لو الرجال ببكاه عيبه
هلت دموعي غصب من ذيك الآخبار= حسرات قلبي من القهر تلتويبه
احس في قلبي كما سنون منشار =يقطع عروق الدم واسمع سكيبه
وعقلي غشاه الهم من كثر الافكار =الين طق الراس وازداد شيبه
حزن غشاني والسبب حكم الاقدار =واللي كتب للعبد لازم يصيبه
الموت سيد الخلق في سكته سار= صفوت قريش وكلنا نقتدي به
مات الشجاع الصيرمي نسل الاخيار =عبدالعزيز وعز من يعتزيبه
ليت المنايا آخذه عنه مليار =ياكثر عيب الناس ويقل عيبه
ليت لنا خلاه قصاف الاعمار= ولخوانه وامه واسرة تنتخيبه
عندي سميه ياعرب مابعد طار= مولود توه في نهار المصيبه
يالله عسى تنبت على قبره ازهار= وتضلله عن شمس قيض ولهيبه
وسع عليه القبر يالنافع الضار= ومن جود عطفك ربنا لاتسيبه
يالله عسى يسكن بساتين وانهار= داخل جنانك ويتعطر بطيبه
يالله عسى تنجيه من صالي النار=ابعد بروحه يمها لاتجيبه
يبكي عليه الطفل والشيخ والجار= حايل بكت والجوف واللي درى به
هذا القدر في حكمته صار ما صار= ياكثر مايخفي ويكثر غيبه
ادعي له الرحمن في سر وجهار= يالله عسى الفردوس يالله نصيبه
صلاة ربي عد ماطارت اطيار= على نبي امته تهتديبه
تحياتي : راحله
ملاحظه : الصوره اعجبتني ويازين كفوف الطفوله
.................................................. ...............................