أحبتي في شبكة بني عبس ( قلعة المجد والتاريخ )
السلام عليكم ورحمة الله وبركاته ,
وكل عام وأنتم بخير بمناسبة حلول عيد الاضحى المبارك أعادة الله علينا وعليكم بالخير والمسرات 00 إليكم هذه القافلــه 00
القلم والثلات وصفحة الكتاب = وفكرةٍ من صميم الراس بكتبها
في يميني حبيس مجوّد المقضاب = بين روس الثلاثه مايفوز ابها
هو ملاذ المشاعر لامطرت سحاب = ريشته من هواجيسي بخضبها
للهواجيس باب ولظروف اسباب = واختلاف الاوادم في مذاهبها
هاجسي بالمحاني شرّع الابواب = البعيده عن عيوني يقرّبها
يازمان المصالح مبعد الاقراب = النفوس العزيزه ليه تتعبها
اكثر الناس يشكي حرقة الاعصاب = من بعض ناس ماقامت بواجبها
وقتنا غيّر الاحباب والاصحاب = الموازين قام الوقت يقلبها
اشقر الريش وكره صار فيه اغراب = والذيابه تعشتها ثعالبها
والحياه اصبحت صعبه وفيها انشاب = عقدوها عبادٍ ضاع مدبها
مدعين المعرفه ناقصين أداب = ناسٍ اعمت بصايرها مكاسبها
والليالي تدور ولشهور احساب = والبشر فوقها الخالق يحاسبها
ومن عطته الليالي درس راسه شاب = الليالي تشيّب من يجربها
ومن بحث بالتراث وسيرة الاعراب = ينصف الناس وإلاّ لايقرّبها
الحقيقه مثل نارٍ على مرقاب = واضحه شمسها محدٍ يغيبها
وكلمة الكذب ثلجٍ فوق سطح تراب = الحقيقه تذوبها وتذهبها
مايحرّف رسومٍ ماضيه كتّاب = لو كتب قاصر اليمنى ورتبها
النقوش القديمه في زمانٍ غاب = باقيه بالصخر لو مات كاتبها
بصمة الحق تبقى لو حجبها حجاب = الرواسي شواهد يامكذبها
مالتفت للحقود ولاسمع الكذاب = القوافل تسير وخاب طالبها
الجبل مايهزه راعي المشعاب = والاوادم يموت اللي يراقبها
ولو فتحنا مجال السلب والايجاب = المحاكم تبي تكثر طلايبها
ولو قراء عنتره في دفتر الانساب = كان يلحق بني تغلب ويغلبها
عندي الرد ياللي تطلب الجواب = مزنة الفكر هماله سحايبها
من يبي يعرف الاخبار والاسباب = ياخذ السالفه من راس ناسبها
قاله اللي اليا منه فعل ماهاب = دون حقه ولو قامت حرايبها
يعطي الحق من نفسه بدون عتاب = والنفوس الخبيثه مايصاحبها
مطلبه بالحياه مشاهد الاحباب = والاحبه تجمّع مع حبايبها
كل عينٍ تمنى عودة الغيّاب = بشروا عين غايب شوف غايبها
كل مافاح من نفح البخور اطياب = ذكّر النفس نفح اطياب طيبها
كل ماشفت من جول الحما اسراب = قلت عنده رسائل خير جايبها
كل ماشفت ذات الظفر والمخلاب = قلت هاذي مرض نفسي سبايبها
كل ماقلت ابا افتح صفحة استجواب = بين نفسي وبين احداث مغضبها
قلت بعض المباني ساسها خراب = الخساره على ناسٍ تعيش ابها
وكل ماقلت وين الاجر والثواب = شفت عين الغضب من فوق حاجبها
بين حكم الحياه وبين داب الغاب = الحياه اصبحت محدٍ يواكبها
التناقض غريب وضاعوا الطلاب = في حقول التجارب يامدربها
من تدرب على علم المراجل طاب = اكرم اللحيه اللي طال شاربها
ومن تعوّد على درب الخيابه خاب = لايفرّح نفوس ولايغضّبها
والتوافيق عند الواحد الوهاب = لكن النفس تبغى من يحاسبها
جمعان خلف الرشيدي