لا يا (....) لا تبحـث الأسبـاب
والوقـت لا تامـن عواقيـبـه
وان كانها تحقيـق واستجـواب
سجل ودون كـل مادلـي بـه
الحب بلـوى والهـوى غـلاب
وويـل مـن طـب بغياهيـبـه
ويا والله اللي ما حسبت حسـاب
رجلي طريق الحـب تمشـي بـه
وانا ادري ان الحب حرب اعصاب
والمسعد اللي سَلْم ما بلـي بـه
ليمـا بليـت بمتـرفٍ جـذاب
ما غير اهوجس بـه واهذريبـه
غرو لـك الله يسلـب الألبـاب
بالسلهمـة والملـح والطيـبـه
ماكنـه الا والغـزال اقــراب
مـن دون لا شـكٍ ولا ريبـه
عاشق عيونـه فـي عيونـه ذاب
ذوب الذهب وان سلهم غدي به
رمشه كتيبـه والعيـون كتـاب
تاصلـك لاسلكـي مكاتيـبـه
شلفا ذياب وفـي يميـن ذيـاب
ياعنك مـا يبـرى مـن تصيبـه
تصوب العاشق بعكش اهـداب
وبنظـره توديـه وتجـي بــه
اهواه واهـوى ليلـه المنسـاب
واسري معه واضيع واسري بـه
واهيم وادخـل جـوه الخـلاب
واطرب واغني لـه واغنـي بـه
واعيش جو انشـودة السيـاب
واغيب واصحي به ولا اصحي به
وان مر طيفـه سيـد الأحبـاب
وانا بنومـي قمـت اهلـي بـه
افـز بـه وافـز لـه باعجـاب
ضيـفٍ تهلـي بـه معازيـبـه
لاوعـي لا تمييـز لا استيعـاب
الزين ما سمع به ولا اوحـي بـه
عاشق عيونه يـا (....) منصـاب
والموت كانه مات مـادري بـه
يـا دمعتيـن ونظرتيـن عتـاب
للجادل اللـي صـده مصيبـه
أسهر وقلبي يا (....) مـن غـاب
والهـم يقبـل بـه ويقفـي بـه
ابـا اتمنـى والبخـت جـلاب
يا الله عسى الاقدار تومـي بـه
يلملم شتـات الهايـب المرتـاب
ويبعـثـره ويعـيـد ترتيـبـه
ويمد لي من بعـد طـول غيـاب
فنجـال واقـدع مـن مذانيبـه