ايها الاخوة الاعزاء في منتديات قبائل بني رشيد
السلام عليكم ورحمة الله وبركاته
احمل بين يدي قصيدة جديدة حاملها الى ابدعات الشعر
وفضاءات القصيد في دواوين بني رشيد
ارجوا ان تنال على اعجابكم واستحسانكم
يا مل عين(ن) موقها حارب النوم = ما سالمت للنوم لو هو شوية
تقول بين أطرافها لحظة هجوم = والمعركة في حربها حاسمية
والجيش ميعز له على الحرب ويقوم = وتقدمت بجموعها المدفعية
وأسراب في جو السماء كنها نجوم = ترقى السماء في مستوى الجاذبية
وقيادة الطاقم على وزن منظوم = قامت توجهم سرية سرية
ومخطط الميدان تخطيط معلوم = في روس من هم عارفين القضية
روس (ن) لها خبرة ومن سادة القوم = وفيهم شجاعة روس ما هي صرية
صقور ساس صقور ما خالطت بوم = الموت الأحمر حاسبينه هدية
تطرب طرب وتشوش وتهوش وتزوم = ما تدمح الغلطة لأحد قيد نية
حتى الصعيب العسر تهواه وتهوم = هوى الفتي لــ الجادل الغشمرية
وأفراد جيش الحرب الهم كذا يوم = كل يحسب أحساب ذية وذية
اللي طرى له من تحراه في دوم =أم (ن) عليه دموعها عابرية
تبكي علية و تذرف الدمع وتلوم = حظ الردى من صبحها للعشية
وأبو (ن) الليا شافه مع الناس مظيوم = ضاقت علية فجوجها الواسعية
الشايب اللي يحفظ حقوق وسلوم = وبمجلسه كيف النشامى سوية
واللي تذكر له صغير(ن) ومفطوم = طفل (ن) صغير وضحكته نرجسية
دوبه يدورج في المدى يطيح ويقوم = حتى كلامه هرجته خربطيه
واللي يقول الحب بالقلب مقسوم = لام العيون الناعسات النقية
اللي على قوله برت حال محروم = في حد قوله كنها العامرية
في لحظة الموقف وما كتب ملزوم = ملزوم يجري كل شيء بشيه
وكل(ن) به الهاجوس لعّاب ويحوم = والهاجس الضايق طعونه قوية
والبارحة اللين ما قال خير(ن) من النوم = فرض الصلاة الواجبه يالبرية
وإنا أعالج جرح والآلام وهموم = و يا كم دفنت في داخلي من شكية
أخفيتها لو كنت مغرم ومكلوم = خايف عذول القوم يخلف عليه
واكتّم أسراري بداخلي وتنوم = طبعي كذا بأموري الداخلية
اخوكم ومحبكم
صالح سعود الفريدسي