[أنكسارحلم]

السلام عليكم ورحمة الله وبركاته

اخواني رواد هذا الصرح الشامخ انقل لكم هذه المحاوره
التي جرت بين الشاعر حامد عوجان الرشيدي والشاعر ابراهيم الشيخي
في منتديات المرقاب .

حامد عوجان :-

سلام ياللي نعزه والغلا من طيب الاخلاق=ماهي مجامل ولالي مصلحه واطرد وراها
اخذت لك رحلة فالبحر حتى زرت الاعماق=والدره اللي بوسط البحر مدري من خذاهـا

ابراهيم الشيخي :-

يامرحبا والمعـزة بيننـا عهـده وميثـاق=والطيب ميزان واللي قدم الحسنة لقاهـا
الدرة اللي بوسط البحر تجذب كـل ذواق=خابرك تدري عن اللي باعها واللي شراها

حامد عوجان :-

ان كان ماللمراجل كل ليل وصبح عشاق=يمكن تموت المراجل من خلاها في خلاها
قدام يومين خيل بالسما راعد وبراق=والارض جادت بماها عقب ماصدق سماها

ابراهيم الشيخي :-

المرجلة باقية مابقيت الاسما والاعـراق=في كل ديرة تجد ناسٍ رفيـعٍ مستواهـا
يامدورين الحيا والبرق يبرق وسط الافاق=بلادكم ضامية والسيل مايقطـع ضماهـا

حامد عوجان :-

الناس تجهد وربك ضامن للناس الارزاق=لو تلتزم بالقناعه كان ماطول عناها
فتشت كل القصيد اللي مسجل وسط الاوراق=ماصار بالذاكره شي يفيد اللي قراها

ابراهيم الشيخي :-

لو جيت تقطع معاليق البشر معلاق معلاق=تلقى الطمع مثل الاكسُجين يجري في دماها
لاتعمّم الحكم والدنيا بهـا شابـع ومفتـاق=ناسِ تعشى وناس تموت ماتلقـى عشاهـا

حامد عوجان :-

راحت سوى هي والاسهم وش جنينا غير الارهاق=واخاف بكره تجينا واحده تاخذ سراها
لو كان مابين الامه ينوجد فرق(ن) بالاذواق=بعض البضايع تجي بالسوق صعب مشتراها

ابراهيم الشيخي :-

انته كما قيل مليونيـر مايرهقـك الإنفـاق=سكنت لك في بلاد قروشك اكثر من حصاها
صدقت لكن خلك في رضا اهل الذوق سباق=الناس لو تاصل المرّيخ ماتكسـب رضاهـا

حامد عوجان :-

دخلتني ياعميلي في علوم سلكها دقاق=بعض السواليف يالصاحب ترانا مانباها
لامن مثلك شهدلي خاطري مرتاح ماضاق=والصيدليه ترى دكتورها يعرف دواها

ابراهيم الشيخي :-

انا ادري انك تجرت بحر مالك مانت بـواق=وان كان زانت ظروفـك ياعساهـا ياعساهـا
لبّستك البشت الابيض مير معك البشت ما لاق=خلك كذا لين تاصـل كـل دعـوى منتهاهـا

حامد عوجان :-

ليا صار بيت الشعر مافيه نار وستر ورواق=لاهب برد الشمال البدو ماتلقى دفاها
اسلم وسلم ودمت ولاحصل توديع وفراق=بكره نجيب اللحون اللي يونسكم غناها

ابراهيم الشيخي :-

اليا طرا لك طواري دون هاك الباب مغلاق=اللي تقدم يدك مـن عندنـا تاخـذ جزاهـا
عديت راس الطويلة وانت للمهياف تـواق=الناس فيها فروق وكل حبـة مـن ذراهـا

( منقول )


تحياتي

الموضوع الأصلي: محاوره بين حامد عوجان وابراهيم الشيخي | | الكاتب: أنكسارحلم | | المصدر: شبكة بني عبس