اخواني متذوقي الشعر الاصيل هذه القصيده للشاعر فلاح القرقاح اعجبتني وحبيت تشوفونها .
ياوجودي كل ماهي ذعذاع العصير = وجد من قفوا بذوده وهو مثناتها
اكنفوه الين حن ورغا عقب الهدير = سربة ماعاقها الله عن مشهاتها
اثلموه اخوان شما وهو شيخ شطير= وعصبته ماتنصر المنتخي فزعاتها
يوم طالع بالوسيمه على ورك البعير = مابقاله من عصا العز غير لحاتها
ماوراه الا يتيم يقدي له ضرير = مع فروع لو ضوا الذيب طق بشاتها
ساقوا اتلى ذود ابوها وهو للقوم اسير= ماله الا الله وابوها يشوف سواتها
يلتفت لين انقطع دونها شوف النظير = تحثى في وجهها الرمل بيدياتها
او وجد من نكد على امه ضحى العيد الكبير = غضب واغضبها والا وفق لمرضاتها
ان تعذر دنقت وانهتت مثل الغرير = وان تركها يلطم الكبد طول سكاتها
او وجد من بشر ورز العزا عقب البشير = جا الولد وامه سهوم المنيه جاتها
شافها كن القمر في نحرها يستدير = بساعة ضمت لحود القبور امواتها
وابتلا مع كبر بلواه بالطفل الصغير = وبنته الوسطى تلوا على عماتها
اتوجد ويتوجد معي حي الضمير = ليا تذكرها وطالع بذكرياتها
ان نظر بهدومها قال يامقسوم خير = وان نظر في منظرتها ذكر نظراتها
منقول لــــــــ فلاح القرقاح ....