[سيف العشق]

ألمس ثرا قلب ٍ مشوا فيه الأحبـاب
وخلوه خالي ., للفـراق وهبوبـه .!

أصلا ً بقالي شي؟ وأقول مـا غـاب؟
حتى الشعور اللي بقلبي نحـوا بـه .!

قفرت من نبت المشاعر ., والأصحاب
راحوا بعد فصل المطـر والخصوبـه .!

راحوا وخلوا لـي شبابيـك وأبـواب
أحضن شعاع الذكريات وغروبـه .!

وأحفظ بقايا عزتـي عنـد الأغـراب
جريح ., والجرح الندي ما درو به .!

بقيت أنا وحدي ., تفاكيري أسـراب
أرتاح نوبه ., وأبكي الفيـن نوبـه .!

أن هلت الفرحه ., تجي مثل الأجناب
وأن مرّت الذكرى ., تمر بصعوبـه .!

بعد الهجر ., ماظن بي شي مـا تـاب
عن السراب اللي حدتنـي دروبـه .!

دخلتها ., راغب معي قلب وأقـراب
واليـوم يالله السلامـه ., وتوبـه .!

العمر صحراء ., أصلها / شمس وتراب
والحب فيها حلـم بيـر وعذوبـه .!

وأنا حفرت البيـر لكـنً الأعـراب
خذوه مني بالمقيض ., ورعـوا بـه .!

ومدام مابه للعمر ., حلـم وأسبـاب
منهو يلوم القلب لـو شـق ثوبـه .!