[مفارق حائل]

الصبر على الزلات

يا هاجسي خلك مع الصبر دايم
واصبر على الزلات وياك وياك

اصبر ليا مرة عليك السمايم
اصبر عليها لين بقعا تعداك

ما دام حظك بين الاجواد قايم
اصبر على عادات مثلك وشرواك

لا تستمع فاللي يحب الظلايم
خلك على نيتك والله يحماك

مالك ومال اللي يحب الشتايم
ان قلت له تعال لي قال ما ابغاك

اصبر على الدنيا بحزم وعزايم
احذر ذياب الخلا لاتعشاك

ياللي تدور للطمع والغنايم
انته تبعت ابليس لين انه اغواك

ما تصلح الا عند راع الولايم
لا عاد مسراحك ولا عاد مضواك

من يتبع المقفي ليا سار هايم
اللي ليا جات المواجيب خلاك

الجو حر وبعض الاوقات غايم
والبعد عن بعض المسافات يحداك

لا تاخذ الا من خيار القسايم
وابعد عن اللي يوم تلفيه يشناك

خلك مع اللي يرفعون العمايم
العزوة اللي تنفعك وقت بلواك

ما همني من يلبسن اللثايم
وما همني هذا ولاهمني ذاك

ابعد عن اللي ينقلون النمايم
واحد تعشى بك والاخر تغداك

وابعد عن اللي يلبسون التمايم
اللي ليا مريت يبغون فرقاك

ياطير ياللي في المحيطات حايم
خلك مع الغربان يوم الله اعماك

متفأل مره ومر متشأم
هذه طبوعك ما عرفنا نواياك

ما انته من اللي يقطعون الخرايم
ولا انته من اللي عارف كل الادراك

منقـــــــــــــــــــــووول

الموضوع الأصلي: وما همني هذا ولاهمني ذاك | | الكاتب: مفارق حائل | | المصدر: شبكة بني عبس