الله كساك الزين واعطاك الثبوت
بالعقل والثقل الحقيقي رابحه
انتي على قول المثل بنت البنوت
وانا على ما قيل كبدي ناجحه
جوف الترف والعز وكبار البيوت
بالقدر والتقدير جايه رايحه
المال يذهب والكدالك والفروت
والحب يبقى والمحبه فاضحه
لو تضحك عيون المنافق والشموت
نفسي من الترفات بعدك سامحه
تجذبني لوصلك خيوط العنكبوت
وأقرا على روح الفراق الفاتحه
عندي لقاك ولا كنوز البنك نوت
ضحيت لجلك بالعيون الذابحه
آمال عمري تحت رجلينك تموت
وريحة عطورك في ثيابي فايحه
تجين تلبسك المهابه والبشوت
وتقفين وقيود الميانه طايحه
أشياء خياليه على بالي تفوت
أذكر ومعك أنسى عشاى البارحه
وجدي على لقياك يالترف الصموت
وصلك قليل ونار شوقي قادحه
ما تقنع العاشق موازين البخوت
واثق واعرف الضاويه والسارحه
صبرت صبر عقاب بعد غياب نوت
وناحت معي ورقا الحمام النايحه
يصبر على الزلات حمال التخوت
ما ينتهز كل الظروف السانحه
الحب يجمعنا وتفرقنا الوقوت
ما شفت لوجيه الجفيا لايحه
غيبي ولا ارضى عن حضورك بألف صوت
وعودي ونفسي في غرامك سابحه