البارحه ياطول ليل التفاكير=بين الحقايق وأختيار الأجابه
حاولت أمررها على القلب تمرير=لاكن عليّ من القريحه رقابه
وأنا ماتجهلني كثير المحاذير=اللي مواريها جداد وتشابه
يامرسلٍ عن حلة الجو تقرير=ومسار تيار الهوى وأنقلابه
أبشرك مافاد فالبدو تحذير=شف كل وبالٍ يباري ركابه
مع درب نوٍ نوض برقه تباشير=وبله حقوق ويبتهج من مشابه
وأنا على دربٍ مشو فيه بسير=البعد مثل القرب ماحسب حسابه
لو أن ماملك شاة ولا أملك بعير=ولا أملك اللي خايفٍ من ذهابه
أشيل همٍ كنّه طويق والنير=همٍ ماغير الله وحده درابه
وأرتاح في خدٍ كسته النواوير=خدٍ خلا ماغير يزمي سرابه
باطراف حد الصلْب ولا محادير=بين الجنوب وبين شرق اللهابه
أدناه عشبٍ ماوطوه المداوير=وأقصاه مشرافٍ يروده عقابه
قفرٍ بعد سيله ماجوه الصقاقير=وماداج في جوّه عسوس السحابه
أسجّ في مرباعه ضحيْ وعصير=ويزيد قلبي عقب ضيقه رحابه
وأفك لاونست الهبوب الأزارير=عن صدري اللي ضايقٍ من ثيابه
ماقد هقيت أن الذي صار بيصير=صيده وراحت من نصيب الذيابه
ومدام مابه شي ماجاه تغيير=ماشفت في هذا الزمن لاغرابه
تغيرت حتى هبوب الأعاصير=وحتى الخواجه صار عازف ربابه
الله يابومحمد يمسيك بالخير=أنت الكريم اللي عزيزٍ جنابه
أذا وصلتك عدني واصلٍ خير=ياملبسٍ روس المراجل مهابه
الله خلق كل البشر وخلقك غير=من طيب ذات وطيب مجنا ولابه
منصا وملفا للرجال المناعير=في مجلسٍ للضيف مفتوح بابه
يامحزم اللي غربلوه المعاثير=وصارت كبيرات الدعاوي طلابه
دون الشهامه ماذخرت المذاخير=سيفٍ تقدر سلته من نصابه
أبرتهي دامي على جمة البير=بيرٍ على الضامي عذيٍ شرابه
بيرٍ عليه الناس ورد ومصادير=ماهو برسٍ خيّب اللي هقابه
ولو تملك قصور العليّا وأغادير=وبنكٍ بسوق المال يحسب حسابه
بمدحك يامشعل معزّه وتقدير=المدح يزهالك وشعري زهابه
أنته رهاوي بالفعول المشاهير=ومن يرتهي في مدحتك لاغرابه
عبدالهادي حامد بن صبح العجرمي الرشيدي