[سالم الرشيدي]

قال ابن ريفه بدافي المرقب العالي = واعلى المراقيب تومي به هبايبها
يامرقبي جاك من الاسبار همالي = انصوب مزن من المنشا يهل ابها
ما يدهله كون صافي الريش ولوالي = ولا الولع يوم يفتك في عجايبها
انا ولد طارفه مانيب كسالي = اخاف من خبرة باحت مزاهبها
عليك يا مرقب جيته وانا سالي = هيض على القلب ديارنٍ شطيت ابها
هيض عليه شدوق ( الثفن ) لا سالي = عطفة ( طريب ) ليا زافت عجايبها
لامن غدا الفيض كنه زرع عمالي = سيله من القدم للبطنان ناهبها
كم مرة قد نزلنا عشبه المالي = بيوتنا لاوزا المجرم يلوذ بها
تنزله ببيوت عراف وجهالي = وانا جا النذر من خفيف مانزهبها
ربعي ( عبيدة ) الياجاهوش وقتالي = هل هية في الضحى تشعا كسايبها
انشد ( عبيده ) هل الطولات من حالي = وانشد الاجانيب يوم انا نقربها
منهو يقلط على فرش وفنجالي = سعد ابن عمه لياجاته مكاربها؟!
لامن غدا بين نقاض وفتالي = وصفت الاجانيب واذاته بطلايبها ؟!
ثم جيتها ثم لفحت بهم على الجالي = لفح الدالي للمعدي يوم يجذبها
ياركب ميمونه في مشيها ارمالي = ماشتحن من هل العيرات راكبها
تزهي السفايف وتزهي الخرج وحبالي = ومجرب لاسرى في الليل صالبها
ملفاك من يلبسون الجوخ والشالي = ربعي ودرعي وضد اللي يحاربها
ملفاك شيخ القبيلة حامي التالي = عند ( ابن شفلوت ) يالمنجوب قربها
قل له على طالت المدة وانا ( جالي )= عشر ( سنوات ) مضت بحساب مقطبها
فان كان ربعي نسوني مانيب غالي = باعيش في ديرة قفرا جوانبها !!
في ايدي قرار تكف الجمع لاهالي = طويلة ناحل مقضب خشايبها
لي بندق ما صنعها الصانع التالي = من دقة ( المارت ) نحال مقاضبها
شريتها بالثمن يوم ارخص المالي = إميه وعشرين ما يمهل بغايبها
الله يرحمك يا عود شراها لي = من واحد جابها للسوق جالبها
حديدها واذكر الله كنه ريالي = كن الحيايا تطوافي مقاضبها
اقف بها بين ربعي وامنع التالي = لا خف ولد الردي ما احتال يزهبها
عط الطويلة عريب الجد والخالي = ولد الردي لا تلخونه يزول بها !!
واللي رفيع وللشوفات حمالي = ارفع نواصيه ياربي وقطبها
وانا من الخبرة اللي شورهم عالي = واهل سلوك الردي يارب تذهبها
بنت غراها زباد في ايد دلالي = ولا طموح هواها من يلاعبها
كم مرة قد ضربنا منجم خالي = وكم جملة فرقتها من ربايبها
وليا لفونا من المقناص زعالي = أحد مدح بندقة واحد يعذربها
بشرتهم العشا من عقب مقيالي = القايدة مع مرد الكوع ضاربها
اضرب بها الوعل لاجاد له تهنفالي = ابو حنية كبير الراس شايبها
ذبحت عشرة بها والظل ما مالي = والحاديه روحت تثلغ مضاربها
ويالله انا طالبك حمرا هو بالي = لا روح الجيش طفاح جنايبها
لا روح الجيش حاديه اشهب اللالي = لا هي تورد وسيع صدر راكبها
اللي على كورها واللي بالاحبالي = واللي على عيزها واللي بغاربها
لا روحت مع سباريت الخلا الخالي = كن الذيابه تنهش من ترايبها!!
تمت وصلوا عدد ماهل همالي = على نبي شروع الحق رتبها
اغفر ذنوب الفتى يالله ياوالي = لا جيت في حفرة رزوا نصايبها

فراج بن ريفه العبيدي القحطاني رحمه الله


وقد وردت هكذا ايضا ..


قال بن ريفه بدا في مرقب عالـــــــــــــــــي=حل المراقيب تومي به هبايــــــــــــــــبها

ما يدهله كون صافي الرش والوالـــــــــــــي =ولا الولع يوم يفنك في عجايبـــــــــــــــــها

هيضني الرجم وأنا من اول سالـــــــــــــــي = لهم على القلب ديران شطــــــــــيت بها

يا مرقب جاك من الأمطار همالـــــــــــــــــي = نصوب صيف من المنشي يهـــــــــــل بها

لهم علينا شدوق الثفن لا سالــــــــــــــــي = وعطفة طريب الي زافت جوانـــــــــــــبها

لما غدا الفيض كنه زرع عمالــــــــــــــــــــي =سيله من القدم للبطنان ناهــــــــــــــــبها

كم مرة قد نزلنا عشبه المالـــــــــــــــــــــي = ببيوتنا اللي وزا المجرم يلـــــــــــــــوذ بها

نبني بيوت بعراف وجهـــــــــــــــــــــــــــالي = وأن جاء النذر من حفيف ما نرهـــــــــــبها

بعوال مفلح وهم حماية التالــــــــــــــــــــي =بمحول صلفات عطيبات ضرايبـــــــــــــــها

صبيان قومي تحل المنجم الخالـــــــــــــــي = كسابه المدح حماية ركايـــــــــــــــــــــبها

ربعي عبيدة وأنا من حربهم جالـــــــــــــــي = هل صبحه في الضحى تشعى كـسايبها

ونشد عبيدة هل الغالات من حالـــــــــــــي =ونشد لجانيب يوم إنا نقــــــــــــــــــــاربها

من هو يقلط على فرش وفنجالــــــــــــــــي =سعد بن عمه الي من جاء مكــــــــــاربها

لما غدا بين نقاض وفتالـــــــــــــــــــــــــــي = وصفوا لاجانيب واذوه بطلايـــــــــــــــــــبها

عديتهم ثم نسفت أبهم على الجالـــــــــي = نسف الدلي للمعدي صوب جــــــــــاذبها

عسى هل الشين ما يبقى لهم تالـــــــــي =وهل اسلوك الردي يارب تذهــــــــــــــبها

ولي جليل وللشطات حمالــــــــــــــــــــــي =أرفع نواصيه يا ربي وقطــــــــــــــــــــــبها

أنا من الخبرة ألي شورهم عالـــــــــــــــــي = واما هل البخل بامر الله نجــــــــــــــــنبها

يا راكب من على اللي مشيها ارمالــــــــي = مأمونة يرفع الهلان غـــــــــــــــــــــــاربها

تزها السفايف وتزها الخرج وحبالـــــــــــــي = ومجرب لا سري في الليل صالـــــــــــبها

حي الطويلة وحي اللي شراهالـــــــــــــي =من واحد جابها في السوق جالــــــــــبها

شريتها في الدهر يوم ارخص الغالـــــــــــي = بمية وخمسين ما يمهل يغايــــــــــــــبها

حديدها واذكر الله كنه ريالــــــــــــــــــــــــي = وكن الحيايا تطارد في مقاضـــــــــــــــــبها

بنة غرها زباد عند دلالـــــــــــــــــــــــــــــي = ولا طموح هواها من يلاعــــــــــــــــــــبها

واضرب بها الوعل لمنه تهيا لــــــــــــــــــــي =أبو حنية كبير الراس شــــــــــــــــــــايبها

لا ثار بارودها الي العود متالـــــــــــــــــــــي = منها الريايا مقطعة نشـــــــــــــــــــــايبها

واطمر بها عند ربعي ومنع التالـــــي =لا هاب ولد الردي معاد يزهـــــــــــــــــبها

والي لفانا من المقناص زعالــــــــــــــــــــي = أحد مدح بندقه والي يعـــــــــــــــــــذر بها

بشرتهم بالغداء من عقب مقيالـــــــــــــــي =والفايدة من مرد الكوع ضــــــــــــــــــاربها

واسرح بها في السحر مانيب كسالـــــــــي = وكم سرحة فرقت منها ربايـــــــــــــــــبها

يا الله وأنا طالبك عطني هو بالـــــــــــــــــي =حمراء من الجيش طفاح جنايـــــــــــــــبها

لا روح الجيش حادية اشـــــــــــهب اللالي = ليهي تورد وسيع صدر راكبـــــــــــــــــــها

اللي على كورها ولي بالحبالـــــــــــــــــي = واحد على عيزها والي بغاربهــــــــــــــــا

لروحت مع تخاتيخ الخلا الخالــــــــــــــي=كأن الذيابة تنهش من جـــــــــــــــــنايبها

فاستغفر الله اللي فوقنا عالــــــــــــــــــــي =حطيت في حفرة رزونصــــــــــــــــــــايبها

فراج بن ريفه العبيدي القحطاني رحمه الله

الموضوع الأصلي: قصيده رااائعه جداً | | الكاتب: سالم الرشيدي | | المصدر: شبكة بني عبس