انا فدى ضحكتك ياداعـج العيـن
وانا فدى همسك وحمرة شفاتـك
وانا فدى ورد(ن) نبت فوق خدين
ثلجك رواها يـوم ذاب بحلاتـك
منك يغارون الصبايـا المزاييـن
وكل(ن) تحاول بس تلمس عباتك
الله وكيلك يـوم بالهـرج تبديـن
تشرب حروف الشوق سكر نباتك
واذا سكتـي لالغـه لادواويــن
تموت حزن وتشتكي من سكاتـك
شفتك وهزيتي خفوق(ن) من سنين
ثابت علـى حلـه وهـزه ثباتـك
حبك يابنت الناس لف الشراييـن
وطبع عليها اسمك وباقي صفاتك
حتى كبر حبك وصرتي تحكميـن
مشاعر(ن) غيرك طلبها وجاتـك
يعني هزمتي ناس ماهم بسيطيـن
ياكبر حظك من يسـوي سواتـك
يكفيك مني يامنى الـروح ثنتيـن
اني تركت الناس واخترت ذاتـك
وانك لياغبتي عن العيـن يوميـن
اعيش حزني كني اسمـع وفاتـك
والله لو اشرح لك الوضع هالحين
والا بقلبي تعرفـي وش غلاتـك
انك بعد حبـي وشوقـي تتوبيـن
عن الهوا والعشـق دبـة حياتـك