[شاعر الصعاليك]

يا بو يمن ياللي عريبه مجانيه = عزالله انك ما انت قطاع ساقه
وافي مع الطيب وخصمك تداويه = وأنا مع الطيب ما أخون العلاقه
اليا بدالي لازم ٍ معك ما أخفيه = حيثك حصان ٍ ما أنت من نسل ناقه
اركب على اللي بالدنانير شاريه = جمس ٍ جديد ما اركبوه الرفاقه
صنعة يهودي ٍ قليله حسانيه = امحكم ٍ شغله بفن وأناقه
بين المواتر وقفته كنه البيه = ياخذ قلوب اهل الطرب والعشاقه
نغمة شكامنيه تجاوبك لبيه = فالخط يازينه وزين انطلاقه
يطوي فجوج الارض بحساس راعيه = ما يشتكي قو الهواء واصطفاقه
وانصى الديار اللي على جال شاطيه = أهل الكرم والطيب وأهل اللباقه
وأنشد عن العمده عسى الله ينجيه = من كيد حساد ٍ بلاها الحماقه
وقله ترى صاحبك ما احد ٍ طمع فيه = يقطع حبال اللي حباله دقاقه
ولا عاد يكثر فالزمان المشاريه = هذا الزمن نافق وما اكثر نفاقه
ما يجرح الانسان كود المسافيه = اللي تعذرب في عيون الصداقه
واللي معك يمشي مكبر علابيه = يا كيف جازكم بكف الحلاقه
ادخل على الله كان هذي ممشايه = غير طباعه ما عرفنا مذاقه
خله يولي جعل ربي ما يهديه = ما للعراقي غير وزنة عراقه
اللي يغير في زمانه مباديه = أطلق حباله لا تشدد وثاقه
فعلك مع أهل التيه عالي مبانيه = جبرت قلب اللي شكى من اعاقه
وحنا معك من وين ما ودك اتيه = هذا زمانك وأنت حدد نطاقه