[سيوف بني عبس]

البارحة ليلي هموم وكوابيس =وأبعد من الجوزاء علي الوناسة

نفسي وأنا والليل والهم وإبليس = كلٍ على الثاني يبي له رياسة

مدري ظروف أو حب وألا هواجيس = أو الثلاثة كلهن فوق راسة

أو إن عقلي صايرٍ فيه تنكيس = وللعقل في بعض الأمور انتكاسة

يالايمي لاتلومني قبل ماتقيس = اللوم للميس يزود بياسة

والشمت طبعٍ للرجال الهلابيس = أهل الهدف والنمنمة والبلاسة

وأنا معي عقل ومشاعر وأحاسيس = وعيون وأخلاق وقلب وشراسة

لكن حصل لي من زماني عواكيس = وعجزت هذا الوقت لا أعرف لناسة

هذا يموها بهرجٍ تماليس = وهذا يتجاهلها عناد وخساسة

وهذا يغرك مظهره بالملابيس = وهذاك يلبس لبس ماهو لباسة

وهذا تذعذع له هبوب النسانيس = وهذاك تقل مغمغم له بطاسة

وللناس بالدنيا حظوظ وقواميس = اللي يغرف بدرام واللي بكاسة

وليا حصل لك من زمانك عواكيس = أصبر وللصبر الجميل انتكاسة

وتدرسك دنياك من غير تدريس = ماهو لزوم إنك تدرس دراسة

وناسٍ على ناسٍ تجند جواميس = لأجل الطمع والسيطرة والنجاسة

وناسٍ تهجس من غثاء الوقت تهجيس = وناسٍ على ناسٍ تجيد السياسة

وناسٍ تبي عرشٍ مثل عرش بلقيس = وناسٍ تبي لو يوم فرقا التعاسة