[شاعر الصعاليك]

جيتك يا أخو جزعا وأنا لي مطلوب = عندك وعندك يالمشورب لزومي
ودي بطير ٍ حر ما هوب مجلوب = ابيض نحر والريش صفت قرومي
عينه يا اخو جزعا كما عين رعبوب = وضربة مخاليبه تفوق السهومي
بهديه للي كل ما يخطي ايتوب = شخص ٍ زهد بالمعرفه ما يسومي
احيان اقول أن السوالف لها أسلوب = وأحيان أقول أني ما اعرف السلومي
وأنا على ما قيل غرقان في ذنوب = والكامل الله والبشر ما تدومي
لا اطرد ورى العالم ولا اجمّع احبوب = ولا اجلس مع الساقط وذر الرخومي
ولاني من اللي يلبس الثوب مقلوب = ولا أشكي من الدنيا وأسب الهمومي
بعض المواقف كنها تفتّح اقلوب = وتعلمك في خافيات الحلومي
والبدو قالوا رأي للحين مكتوب = يشرح وش اللي خافي ٍ بالعلومي
ثوب ٍ ما هو ثوبك ولا فيه معيوب = اخير لك من باليات الهدومي