رجـمٍ بـدا فتـان فـي مرقبـه نـوف=
أم الوحـش بحمـاه تبـنـي وكنـهـا
عمـرّدٍ يزمـى عـلـى رأس قفـقـوف=
يكشـف طـوارف شامهـا مـع يمنهـا
معلولي ٍمـن نحـت الأريـاح منحـوف=
فـي راس عيطـا مكهـفـاتٍ ركنـهـا
يكشـف غطاليـس ومغـارات وكهـوف=
ويبـدي عليـك المختفـي مـن وطنهـا
رجـمٍ بمرقابـه راع الصنـف مكلـوف=
مرقـاب مـن روحـه تزايـد شجنـهـا
جلست بظلالـه عقـب ساعـة وقـوف=
يامـا غـروب الشمـس قـرّب زمنهـا
أديـر بأفكـاري مواقيـف وأصـنـوف=
وعـوايـدٍ سـيـل التـطـور دفنـهـا
زاحت كما زاح الطخاء ريـح عاصـوف=
أقفـت بهـا جـرد السنيـن ونحنـهـا
عوايـدٍ هجـر النيـا لافـهـا لــوف=
عصـر التقـدم سيـف غـدره طعنهـا
أقفـى عليـهـا دون رحـمـه ولا روف=
وأحفـاد أهلـهـا حاملـيـنٍ كفنـهـا
بس الآثار ورمس نقـشٍ علـى حيـوف=
لأجـيـال دورات الليـالـي محـنـهـا
جريت من صـدري تناهيـت وحسـوف=
ونـشـدت دورات المقـاديـر عنـهـا
وين الزحول اللي بهـم يدحـم الخـوف=
اللـي نهـار الكـون تحمـي ضعنـهـا
سباع الرجال اللي لها الصعب معسـوف=
ليا أرزم وغى الهيجـاء وثـوّر دخنهـا
ما أعدهم فـي هالفيافـي خـذو طـوف=
ولا أعـد مضهـود الرفـاقـه زبنـهـا
من دونهـم حالـت غياهيـب والجـوف=
واللـي خلـف ريـف الهجافـا دشنهـا
وين الجهام اللي علـى العـد مرصـوف=
يشمـل قفـور المرتفـع مـع طمنـهـا
يرعى هَيَتْ مـا صفّقـه كـل مزهـوف=
وقـومٍٍ تنـوش حمـاه تِقْطـع وتِنْـهـا
وين البيوت اللي لهـا القـدر محـروف=
عـن المسيّـر مـا تقَـطّـب عننـهـا
برفافهـا كيـف الرجاجيـل محـيـوف=
ومـن ضَدّتـه سـود الليالـي زبنـهـا
بيـوتٍ تبَّنـى للمسايـيـر وضـيـوف=
وان طبهـا الخايـف حياتـه ضمنـهـا
ميسورهـا يغنـي معاويـز وضـعـوف=
كمٍ مـن ضريـرٍ جالـه العـون منهـا
اسلـوم عنهـا جيلنـا يعلـن عـزوف=
داع الحـضـارة والتـقـدم رهـنـهـا
دارت رحى شهب ٍ شلاهيـب وعجـوف=
بيعـت بهـا الشيمـة رخيـصٍ ثمنهـا
أدوار وأســرار ومقـاديـر وحـتـوف=
سيـرة حيـاة الحـي هــذي سننـهـا
تظهر علينا أشكـال وأنـواع وصنـوف=
تخيـف اللبيـب اللـي بعقلـه وزنهـا
تفرقـت شوفـات وأهـداف وشـفـوف=
والكـره خيّـم بالنـفـوس وشحنـهـا
وحّل الظلام وصاب شمس الضحى كسوف=
وعقيَّلهـا خـافـت بـوايـق خونـهـا
قـل التواصـل وإِنمحـى كـل معـروف=
وأيامـنـا كـثـرة بــلاوي شطنـهـا
وعَفن الرجال أصبح شجـاعِ وعيـروف=
سبـع اللغـات المستحيـلـة رطنـهـا
وصارت على الطيَّب مهاميـز ووشـوف=
وعليـه عَفـن السـاس يامـر وينهـا
وراي المرة ماخـوذ ورجالهـا وقـوف=
تقودهـم قــود العسـيـف برسنـهـا
الحر غـاب وعـاث بالجـول أبالعـوف=
وأسودهـا بكهـوف حيـفـا خزنـهـا
ذل الجسـور وصاطـي الكـف مكتـوف=
وأهـل السلـوم الوقـت غيّـر لحنهـا
ياحيف مـا هـذا لنـا مهـد ووصـوف=
حياتـنـا نقـطـع بتـايـت منـنـهـا
أحفـاد مـن ترثـت مقاديـم وسلـوف=
نتبـع غيـانـا والنـفـوس بوهنـهـا
تـردت الهقـوات والحـيـل متـلـوف=
نـاسٍ تــرواد بالرذيـلـة ألسنـهـا
تم الجـواب ومنهـج الهـرج مكشـوف=
مـن عـارف لـه غايـةٍ مـا لكنـهـا