[عبدالرحمن الحميدي]

انتي نسيتي قلبي اللي خذيتيه=مدري هو يسلي أو إنك سليتي
رحتي بقلبي ماطرى لِك ترديه=تعبت!! أنقّل جثتي ماعفيتي؟؟
لو شفت زولٍ مايعٍ في تخطّيه=والله مايلفت لي نظر ماحييتي
ولو الغرض منِك مضاجع وترفيه=والله ماقول إنك بحقي خطيتي
لكنِك إنتي عشقٍ اغليه واغليه=وأنسج من خيوطه تفاصيل بيتي
وإن طال بعدِك واتعبنّي لياليه=لا نمت زوريني وابا اقول جيتي
واحتج فيها لا خذ الحب طاريه=واوسع اللي في خفاه إرتميتي
صدر ٍ بقايا الروح في بعض باليه=وتطعنّي ضلوعه ليا من طريتي
ردّي علي القلب ابا اشوف تاليه=كانِك عن علوم الغرام انتهيتي
لا تعلقيني بالأمل والمشاريه=ترى العمر مره واظنك نسيتي

الموضوع الأصلي: ردّي علي القلب | | الكاتب: عبدالرحمن الحميدي | | المصدر: شبكة بني عبس