[عبداللطيف الرشيدي]

البارحه ليلي همـــــوم وكـــــوابيس*** وابعد من الجـــوزاء علي الوناســه
ماغير أنا والليـــــل والثالث ابلــيس*** كلـن على الثـــاني يبيله رياســـــه
مدري ظروف أو حب وألا هــواجيس*** وألا الثـــلاثه كلـهن فوق راســــــه
أوأن عقلـــــي صــايرٍٍ فيه تنكيس*** وللعقل في بعض الأمور انتكاســـه
يالايمي لاتلومنــي قبل مــا تقيس ***واللـوم للــــمييس يـــزود بيـاســـــه
والشمت طبـع للرجـــــال الهــلابيس *** اهل الهـــدف والنمنمه والبلاســـه


وأنامعي عقل ومشاعــر وأحاسيس*** وعيون وأخلاق وقلب وشراســـه
لكن حصلـي في زمانـي عـــواكيس*** وعجزت هذا الوقت لعرف لناســـه
هــــــذا يمـوهـــــا بــهرجه تمــاليس*** وهذا تجاهـــلها عـناد وخساســه
وهذا يغــرك مظهــــره بالمــــلابيس*** وهذاك يلبس لبس ماهـــو لباســه
وهذا تذعذع لـه هبــوب النســــانيس*** وهــذاك تكل مغمضٍ له بطاســه
وليا حصلك من زمــانك كعــامـــيس ***أصبر وللصبر الجميـــل انعكاســه

تدرســـك دنياك من دون تدريـــــــس*** ماهو لزوم انك تــــدرس دراســــه
وللنـــاس بالدنيا خصوص وقواميـــس*** اللي غرف بدرام واللي بكاســــه
وناس تهجس في غثى الوقت تهجيس*** وناس تسايسها وتاتي سياســـه
وناس تبي عرش مثل عـــرش بلقيـــس*** وناس تبي لو يوم فرقى التعاسه
وترى الردي لوفيك ســـوى نواميس*** ينقد على نفسه ويرجع لساســه
والتيس مثل العنز كان انخصى التيـس ***والتيس ماهو تيس لولا التياســـه