[راسبه بالحب]

بعد الفقر حطت شريحه وجوال


بعد الفقر حطت شريحه وجوال
يسعد مسـا جوالهـا والشريحـه

كانت تجيني تشتكي قلة المال
وتصيح لا جا طاري الفقر صيحه

تقول ابويه دايم الدوم رحال
وامي كبيـرة سـن دايـم طريحـه

وانت الوحيد اللي له القلب ميال
دايم يصارحني وانا له صريحه

طفله وانا معشوقها بين الاطفال
جريح حب طاح له في جريحـه

كنا سوى نرسم على التربه امال
واحلام تقتلها الحياة الشحيحـه

كم دمعه كانت على الخد تنهال
واذا انزلت ضاقت على الفسيحـه

الله كم صرخه وهمسه وموال
الله كـم جـادت علينـا القريحـه

نخيل لو ما في السما برق وخيال
وانكذب الايام لو هي صحيحه

تقول لا حطيت لك بشت وعقال
ويسر لك الرحمن عيشه مريحه

اخاف تتركني على عثرة الفال
للفقر ووجيـه الحيـاة القبيحـه

وحبيتها بين الخلايق والازوال
حب يطول الوقت ماحد يزيحـه

وسلمتها قلب تباريه الاهوال
وطاح الخفوق وطيحة القلب طيحـه

راحت وخلتني مع القيل والقال
شاعر صواريف الدهر تستبيحـه

ودار الزمان وغير الحال بالحال
وجاها الزمان بكل ورده وشيحه

فله وخدامه ولكزس وجوال
وانا عجزت ادفع رسـوم الشريحـه

..

الموضوع الأصلي: بعد الفقر حطت شريحه وجوال | | الكاتب: راسبه بالحب | | المصدر: شبكة بني عبس