[هذيان]

يتنفس الليل من ضيق الزوايا كلام ..
............................. والوعْد يفرش على رمل الاماني حصير ..

الحلم ينصب على بيدا ظروفي خيام ..
.............................ويضمني من - شتا الواقع وصيف المصير -

استصغر الحزن رغم اني اعيش فظلام ..
.............................مثل القمر واقعه مظلم لكنه ينير ..

احاول اعكس طموحي في عيون الانام ..
.............................واكحل الحال لو انه زماني ضرير ..

حملت نفسي من الدنيا هموم وخصام ..
.............................وصار الامل في عيوني مثل/ كف الفقير ..

اللي ليا طاح دمعه ، والاسى فيه قام ..
.............................يشوف نفسه وسط عين المزكى كسير ..

قالوا لي صغير لا تحمل زمانك ملام ..
.............................جاوبت قولوا لزماني : لا تعارض صغير ..

تمر الامال في عيني مرور الكرام ..
.............................شرواة صحوة ضمير بصدر مابه ضمير ..

واليوم سقت الطموح ونظرتي للأمام ..
.............................واللي تبقى علي افرد جناحي واطير ..

هنا ترفرف من افواه القصايد حمام ..
.............................واشم للعز ريحة زعفران وعبير ..

غيري يقول المطر ناتج من الاصطدام ..
.............................وانا اقول السحاب اتعبْه /طول المسير ..

يبغي يخفف من حمول الظروف الجسام ..
.............................وارخى جفون العنا وانهل دمعه غزير ..

مثلي بعد ما اختنقني (الصمت ) صغت الكلام
.............................نثرت منه الكثير .. ولي تبقى كثير ..