[رائد الذيابي]

قبل ترحل عن أيامي بقلبٍ عظيم
.................. لحّف العمر يَ عمري دفا معطفك

وطفّ نور الدروب اللي تشّب العتيم
.................. وأقتل الدمع ! بعيونٍ رضت تذرفك

سامح الله ! خفّاقي وذنبٍ قديم
.................... قبل أمنّي عيوني بالفرح وأقطفك

ما ذخرتك لْـ صوتٍ بالأماني عقيم
..................... ولاَعتقتك لْـ صدرٍ للتعَب يجرفك

نظرتي قبل أفجّ الشوف وأكبر وأهيم
.................. كبّرتني ب عين الناس قبل أسرفك

ونظرتي يوم ملّ الصبر، صبر الحليم
.................. علّمتني وش ايامي بدون أحرفك

أنت جرحٍ يعرّي للضلوع النسيم
.................... كل ماهبّ طاري بالعمر يعرفك

مبطي العمر يلمحني بنظرة يتيم
.................. ومبطي الصبر يغري بالحزن مُرهفك