[غربة الروح !!]

لابان نور الصبح واجتاح فجري
يشبه شعاع ضيع دروب سيره

آهات تقتل فيني زهور عمري
وطعون كانت من يديها كبيره

مدري تشاؤم مدري إحساس حصري
مدري مصيري مرتبط مع مصيره

ألبس ثياب الجرح وغطاي صبري
ما كنت أقايس ذي كبيرة وصغيره

أشرب همومٍ صبها نبع قهري
وأثمل جروح مبطيات عسيره

مرات أضحك وأرجع أقول بدري
عشت انتظار النور ما عشت غيره

مرات اكتم عبرتي وسط صدري
ومرات دمعي يعجز يطير طيره

مرات ادري وأغلب الوقت مدري
ما قمت أميز صابت النفس حيره

ضميت حزني وأدمعت عين شعري
الصمت يجبر لي مشاعر كسيره

صبحي سواد وما فرق عنه عصري
همي بلاد وحزني اليوم ديره