يامصدر العشق والالهام والبسمة
لك مني الروح ويا السمع والطاعة
والحب لك والغلا ما يقبل القسمة
الاعلى رضاك شفت النفس طماعة
والضحكة اللي على محياك مرتسمة
هزت جدار الغلا في القلب واضلاعة
بس نظرة الحب تدري ليش منقسمة
من حيرة الود ولحن الشوق وايقاعة
اللي وصل حق ربيع القلب في وسمه
واحيا هشيم الغلا وانبت زهر قاعه
ومن صار كفي اليمين بكفك العسمه
افتك راس العنى من كثرة صداعة
دام الحكي منك الطف من هوا النسمة
واحلى وارق من صنوف الشهد بانواعة
تعال شف عين من حبك وشف جسمه
عن قرب والمس هوى مغليك واطباعة
اتصدق اني قبل لاتكون بالقسمة
كنت اكتب احلى قصيدي فيك كل ساعة
وحتى اتاكد من اللي واضع وسمه
في قلب مثلي وطابع صورته طباعة
تعال وافتح خفوقي وانظر الرسمة
شف بالهوى من سطابه الحب لخناعة
واحلفك بالذي ما قد ذُكر اسمه
الا على الحق وقول الحق والطاعة
قل لي وش اللي رايت وودك تحسمه
في عين مغليك وفي قلبه وبذراعة