أمانة يالوفا / والشوق / والإحساس / والتقدير
أمانة يالحروف اللي .. تذكّرني بميلاده
أنا بالي غدا خالي .. وتفكيري ماهو تفكير
أمانة قدّري وضعي .. وردّيني لميعاده
عشاني زوري عيونه .. عساها غافيه بالخير
عسى حُبي وتقديري .. يزيد اليوم بإسعاده
ألا ياسبّة أوجاع القلم .. ياوش بقى بيصير
من أول ما اختفت عينك .. وحالي ماهو بالعاده
أنا من غابت عيونك .. عجزت أفسر التأخير
وعقلي ماهو بيدي .. غيابك ماني معتاده
عساك بخير ياجرح الأماكن يا نصيب الغير
عسى روحك معي تبقى بطول الوقت منقاده
عسى ذيك الليال اللي قضيناها بلا تقصير
تجيني في فراغ ٍ سبّبه بُعدك ورعّاده
ابكتب لك واغني لك .. قصايد من مزاج ٍ غير
ترددها على سمعي وارددها .. على العاده
باحاول أجمع الماضي .. وواصل رحلة التبرير
لحالي عايشك واضحك على هالحظ وامجاده
أمانة لا وصلك الحُب / والإحساس / والتقدير
أمانة وقعوا تاريخ ميلادي .. بميلاده