أبيات هي الأقرب ،،
يَآطير أنا عَايشْ على قَدْ حآلي=عيني تشوف الحآلْ وايدي قصيره
قناعتي في دنيتي راس مالي=واضَحْ مثل شمس النهارْ المنيره
ماهمني لو شين الوقت فالي=همي دوام العافيه والستيره
ماقد عنيت الا لشخص عنالي=والرجل عن بعض المنازل كسيره
(ربعي جماعه مير شفني لحالي=لاصار جمع القوم مافيه خيره)
اجامل الحسّاد لا جاء مجالي=وأشره على بعض الملا وأستشيره
وبداخلي ياطير مما جرالي=هم بحمله شفت نجم الظهيره
يلومني فالحال شين الرجالي=من لا تلوع في حياة مريره
أحلم وكني نمت بالغيم عالي=واقعد ولني وفوق هاك الحصيرة
كني مع الصاحب من العيب خالي=وكني مع الحاسد عيوبي كثيره
وأذكر من الحرمان (خل) صفالي=وافاه غيري ثم (غيّر) مسيره
ولا بقى ياطير فالناس غالي=ياكثر من ينسى ويقسى ضميره
يقولها من عاكسته الليالي=عقب الرخا كل الطواري تثيره
أرحل من الواقع لصحرا خيالي=كود القصايد ترتوي من غديره
مير الرجا بالله على كل حالي=شكواي للمعبود ماهي لغيره
منقول لأحمد عبدالحق