رفعت قيمتها على كل البشر فوق السحاب
وسكّنتها بين الضلوع وقلت هذا بيتها
وأعطيتها العمر الحزين وكل ماتطلب مجاب
وأحلى ورود امغلفه بالحب دوم اهديتها
وقريتها أجمل عبارات المحبه في كتاب
ودرّستها حب الوفاء وياما دروس اعطيتها
وعلمتها كيف الوفي يصبر على طول الغياب
وعلمتها كيف الغلا يبقى ولو خليتها
وعلمتها كيف الخطاء مايلتقي هو والصواب
وعلمتها كيف الفرح يطغى اذا ناديتها
وعلمتها وشلون انا قلبي من اسبابه مصاب
وعلمتها ياكم عيوني في هواه اشقيتها
احيان اقربها غلا وأحيان ابعدها عتاب
واحيان اعاندها واقول اني ولا حبيتها
تزعل علي وتنفعل وتصير في حال ارتياب
ولا ابالغ لو اقول الناعسه بكيتها
فديتها ياكثر معها خافقي والليل طاب
فديتها كثر البيوت اللي لها جاريتها
الجادل اللي من هواها ذاب قلبي ثم ذاب
اللي على شوف العيون الغاليات اغليتها
اللي سكن قلبي غلاها لاسؤال ولا جواب
واللي ملك قلبي هوها بالغرام وجيتها
اللي تقّفل دونها في داخلي مليون باب
واللي لها كل الأمور الثانيات انهيتها
اللي سكني حبها من بين تلعات الرقاب
وشلون ما اغليها وانا على يدي ربيتها