[كلي طموح]

خبري بك أقفيت سبّـة شـي ماقلتـه
وانا انتظر في زعـل ودّي تراضينـي

ان كــان ودّك بــذلٍ ماتطاولـتـه
أبشّـرك عنـد عــزّي ماتعزّيـنـي

حـاول تفـكّـر بـشـيٍ ماتخيّلـتـه
وشلون أبضمى وانا مسقيـك بيدينـي

وادي خفوقـك بـزود الحـب سيّلتـه
واعطيتك الشوق والشعـر ودواوينـي

حتّى الحـزن فيـك واسيتـه وقلّلتـه
لين الفرح صـاح ينخـى لا تخلّينـي

دمعـك مسحتـه وجرحـك ماتقبّلتـه
وأهديتك سنين للفرحـه مـن سنينـي

الشعر غنيّـت بـه والصعـب ذلّلتـه
عسـى قصيـدٍ كتبتـه فيـك يرثينـي

في دنيتـك كـل شـيٍ مـال عدّلتـه
الا بطبعك عجـزت ألقـى عناوينـي

واليوم طبعـك بطـول الصـدّ كمّلتـه
هذي شهور وليالـي وانـت ناسينـي

ان كانك اخترت غيري شخص بدّلتـه
الله يهنّـيـك بــه والله يهنّـيـنـي

وان كان باقي بقلبـك حـب ماشلتـه
بس اعترف بالغلا .. وان كنت شاريني

ابسئلك كيف أبكره شخـص دلّلتـه؟؟
وأبنصحك ردّ قبل تطيـح مـن عينـي

وان كان في خاطري وصلك ولا طلته
يكفيني انّك رحلـت وخاطـرك فينـي

::