يابو عيونٍ سـود لحظـه دقيقـه ودي اشوف الكون داخل عيونـك
قالت تفضل شوف بالعين ضيقـه وبشر تشوف الهم واسرار كونك
يابنت اشوف الناس داخل غريقـه انتي غريبه والبشـر يعشقونـك
قالت عفو قلت العفو والطريقـه قالت توقـع وش توقـع ظنونـك
قلت الحقيقه مدري وين الحقيقـه بس الدموع السايله في جفونـك
قالـت يتيمـه لا ولالـي رفيقـه قلت الزمن كفى وزّود طعونـك
قالت صحيح ان الزمن مانطيقـه بس المصيبه في حبيبـن يخونـك
قلت الصداقه قصدي وين الصديقه قامت تبسم بالزمن مـن يصونـك
انتي من الاحزان صرتي دقيقـه يعني كذا العشاق شكلك ولونـك
قالت كفى والدرب غيّر طريقـه قلت السموحه والحلا في عيونك