السلام عليكم ورحمة الله وبركاته
اسعد الله صباحكم ومساكم بالمسرات
اليكم هذه الابيات التي كتبتها با احد زملائي عندما شرى قطيع من الغنم وشرى معها جمس عبارتين 454 رفرف لونين
عساء ان تحوز على رضاكم
يابوسعد مايستوي عندك اثنين=من بينهم يالشيخ فرقا وسيعه
يلي شريت الضان مع جمس لونين=اماتبيع الضان والاتبيعه
الجمس مايصلح خوي"مع الضين=لافي حميم القيض ولاربيعه
لاصار رفرف والمكينه قزوزين=له منضرن وسط البعيره شنيعه
الجمس يصلح مع قطيع البعارين=لاروحت قام ايتتالا قطيعه
وهدرة فحلها مع رطين الشكامين=تعطيك صوره عن جمال الطبيعه
البل ولع واسعارها بالملايين=تجاوزت سعر الذهب بالمبيعه
اليا رزقك الله بذود" مزايين=وربعت مابين الحفر والرفيعه
مثلت بالشيخه عيال السلاطين=اما ولد سلطان والا رضيعه