[مرزوق العجوني]

البارحه والجاش طالت مساريه=اخذت به مع شرَّد الجول هدَّه
جاشي واعَرْفَه وآتحامى عتاريه=أزنَّدَه يمناي وان راج اشدَّه
يشبه لدوّ ٍ خايعات ٍ خباريه=من وين ما هب الشمالي يضدَّه
عليك ياللي عَرْشْ الاضلاع فاريه =ولا ينتثر سدَّي على غير سدَّه
ما عاد به يا لايمي ما نواريه=اما تجيب العِلْم وإلَّا تردَّه
علَّمتني كثر العتب والمشاريه=وعلَّمتك ان الشوق ملعون جدَّه
انا زبون الطيب وافرق غثاريه=يوم انِّ عمرك راح فوق المخدَّه
بالك تجيب اقصاي تشحذ شباريه=شيب ٍ نما من مفْرَقَك لا تكدَّه
اللي على عمياه يتبع مواريه=ياخذ على راسه وعينه وخدَّه
واللي يذرِّي ما يطوَّل مذاريه=ادنى هبوب اليا تبيَّن تهدَّه

من لا يجاريني فْ لاني مجاريه=ومن لا يوقَّف ند ما نيب ندَّه

ومن لا يخاوي راس عَيْطا يباريه =ومن لا يحدَّ الوقت وقته يحدَّه
ومن لا يحشَّم لحيتي عن مزاريه=يكفِّ يدَّه .. قبل لآقصِّ يدَّه
كم واحد ٍ يِحْرِيْ وبارت محاريه=ودَّه وجت عوجا على غير ودَّه
فرخ الحَرَارْ اللي يصخَّر حباريه=ما ياكل الَّا من مناجيب عدَّه

الجاهل اللي ما يداريك داريه=وان ضاق صدرك قَدَرْ رجليك مدَّه

رَجْل ٍ اليا من جيت عنده حذاريه =ان بشِّ بش .. وْلَا زعل من يردَّه
ورَجْل ٍ مداه بْعيد ماش ٍ يثاريه=ما يبرك الَّا عند ناس ٍ تودَّه

ما كلِّ من يبكي تغرَّك عباريه=وما كلِّ رجَّال ٍ يلدك تلدَّه

لاش ٍ يكدَّر خاطرك لا تماريه=بدَّه مدامك تستحي مِنْه بدَّه
القوس لا جت حزَّتَه عَطْهْ باريه=والنافذ اللي يولج الريح سدَّه

.

.

.

لرائع ../ بدر الدخيل

الموضوع الأصلي: القوس لاجت حزته عطه باريه... | | الكاتب: مرزوق العجوني | | المصدر: شبكة بني عبس