تناسيني بنفس الموعد اللي به ذكرتيني ..
أنا ما اقدر أعيش اللي بقى لي من العمر باوهام
عبس وجه الزمان وزاد لومه لا تلوميني ..
طغى جور الهوى وانهى سنين من الصبر واحلام
أبغفى كني الطفل الغرير ولا تصحيني ..
أبي أرتاح من بعض الشقا ومن لعبة الأيام
طلبتك كان لي في داخلك بعض الغلا اجفيني ..
ترى حر الجفا أهون كثير من الوهم لو دام
سلام الله على وقتٍ مضى وما صار به فيني ..
خبا ضي القمر والشمس ما قد شعشعت من عام
هناك بعيد ويّا الشوق غنيني وحبيني ..
وهنا لا تقربي ضاق المكان بزحمة الأقدام
هواي العاف يا أسمى القصايد في دواويني ..
أنا لي قلب ما يقبل يضيم وما يبي ينضام
تخيّرت ابتعد والصمت والوحده عناويني ..
وإذا ودّك تزوريني تعالي بس في الأحلام