صارلي فتره ماشبكت اشغلتنى الاختبارات الله لايشغلنا الا بطاعتة
مكان تواجدي الان قاعه الدرجه الاولي في مطار جون كينيدي JFK Airport في مدينه نيويورك الساعه 12:15 بتوقيت مدينه نيويورك باقي تقريبا 9 ساعات وبعدها تعلن الخطوط الجويه الكويتيه عن اقلاع رحلتها 118J المتجهه الى الكويت.
الحمدالله خلصت اختبارات الكورس الاول والحين اجازه الكريسماس 16 يوم ان شاء الله اقضيها في ربوع الكويت الحبيبه.
من كثر مااحاتى امتحان القياده والحرب الالكترونيه كنت اقول يارب مايجي يوم الأربعاء وبعدين اقول ودي يجي الجمعه يوم السفر قبل الاربعاء متروع من امتحان القياده والحرب الالكترونيه تقريبا معطينا 28 كتاب واقل كتاب 150 صفحه طبعا كتاب ابو 150 صفحه هذا اتنقش فيه اسنانك يعنى وقت الفراغ اطقطق فيه لان باقي الكتب على الف صفحه. لعنبوه الكاتب منين يجيب الكلام شلون كتب الالف صفحه وانا عشان اكتب بحث بالكتاب افتح فمي 4 ساعات وبعدها اكتب كلمتين واقول خلاص كافي كلمتين خلنى اخذ استراحه :).
الاسبوع اللى فات من كثر المذاكره احس ان عيونى طاحت بحظني الله لايخيب تعبنا ان شاء الله.
مادري ليش في هذي اللحظه طرت على اغنيه
انا رديت لعيونج انا رديت
ولج حنيت مثل مايحن حمام البيت (يعنى تراني وطني )
طول عمري على بالى عبدالكريم عبدالقادر يغني الاغنيه حق حبيبته توني دريت ان الاغنيه وطنيه حق الكويت :)
؟