العمر يمضي ياترى كم بقى كم=واقول لو ذلحين موتي يجيني
مدري بوسط القبر باعيش في غم=ولا فرح يجلي هموم الحزيني
اخاف لا حان الجواب اتلعثم=لا قلت ربي ثم نبيي وديني
اما فتح لي باب منه اتنعم=وارى جلوسي في مكانن اميني
ولا فتح لي باب منه اتألم=وارى جلوسي في مكانن مهيني
اما ليا حان الحساب اتبسم=اقرى كتابي شايله في يميني
ولا بكيت وبالشمال اتقدم=ابكي على ماضاع لي من سنيني
يا لله ياللي في عبادك تحكم=ياللي جميع الناس بك تستعيني
طالبك تغفر لي ذنوبي وترحم=وان مت تجعلني من الفايزيني