[أسايرها تعاندني]

يوم إنحدر عقرب الساعه ، و شَّد الرمي= بين الهواجيس ، والهقوات متقاربه
هانت على العين غفوتها قبل تنتمي= قلت أبشري بالسَهر ، هي خاربه خاربه
في ساعةٍ ما بها من يقتحم عالمي= لجَّة دجى تجعل الأخبار متضاربه
ما تشبه القلب ، لو تشبه مداد قْلمي= وإلاَّ البحر ما هو البحَّار ، يا قاربه
وأنا إلى قلت صعب القول .. والما بفمي= ماني مثل من عقارب فمه متحاربه
في ساحةٍ ما بقى من زيفها منكمي= و أوهامها نجوم ، والمستعربه عاربه
ما عافها مبصر ، إلاَّ حافها منعمي= إن ساح ، وإن طاح ، بالظما ما هو ذاربه
لأستل معجم سواه ، الصدق هو معجمي= شروى المطر ، كفو من هلَّه ، كفو شاربه
قبل أتذمَّر ، وأنا راسي سما لعْلمي= والحر تكره بغاث الطير مآربه
وأنا آدمي .. ماني الجني بشكل آدمي= وقَّع به الطبل ، عقب الشعر ما طار به
والشرهه أكبر من الهافين والهيلمي= ولا هي كفو من يلِّقي شرهتي غاربه
محميّة النور ، لا صارت بلا محتمي= الطيًَّب اللي تقاسمها مع أقاربه