جازت لي .. وجت على جرح
الشوق ماله عمر .. يفنى وينعاد=له فالضلوع إن عاد وأن غاب رجفة
مع كل فرقا .. له ورى الجفن ميلاد=وإن ماتت الفرقا لقى الشوق حتفة
جيت أقتل الفرقا من بلاد لـ .. بلاد=مل الطريق يشيلني فوق كتفه
وآنا بعد مليت من كثر ماأرتاد=هالشارع اللي كان لك فيه شرفه
تظمى عيوني شوفك وتشبع سهاد=عيا الزمن يقطع ظماها برشفه
لا وجهك أسقاها ولا ذاقت رقاد=ماغير طيفك .. طيفك اللي أعرفه
كنه ظبي وعيونك ظلال صياد=يجفل قبل يرتد للجفن طرفه
مشكلته أنه كل ماأشتقت يزداد=حتى ملا جدران وقتي وسقفه
وأصبحت أشوفه فـ .. أول الغيم لا جاد=فـ .. أقصى الشفق .. لا طاحت الشمس خلفه
أتعبت طيفك لوم .. واللوم مافاد=ويوم الأمل في شوفتك مات نصفه
نويت أسافر عنك بجروحٍ جداد=وعمرٍ من أوراق الزمن حان قطفه
نويت لكن جابني الشوق منقاد=وجابك حنينك والزمن سال عطفه
شفتك تبسم لي خجل مدري عناد=وفي نظرتك شوقٍ من الظلم وصفه
حسيت كني طفل وعيونك أعياد=ياعيدي اللي لك ورا الصدر رجفه
سم اللقا صدفه .. وأسميه ميعاد=أنا أنتظرتك .. وأنت مريت صدفه