مشى معك لو كنت في غبة بحـور
روحه علـي كفـه عطاهـا كفنهـا
لا دخلت السجن والحـال ميسـور
قبل الكفالـه لـك الـروح رهنهـا
حتى لو انه يملك امـوال وقصـور
عنـد الـزوم يجيـك ينقـل ثمنهـا
يامحلا المقنـاص والجـو ممطـور
ومشين علي الرقـه يعالـج قدمهـا
معنا بلاجيك وعلي كفوفنـا صقـور
راحـت وناسـه مـا نـدور بدلهـا
واليوم شفنا ناس تطمر علي السـور
وجيران بيته يـوم سافـر هجدهـا
يلبس علي الموضه وله سن مكسور
وياخذ طبايـع نـاس ربـي قردهـا
وان قلت له ياورع وش فيك محرور
يقـول لـو كنـت رجـال عـدهـا
قلت انت يا ورع وش فيك مقهـور
ربتـك خدامـه علـي طبـع يدهـا
طرطن رطينتهـا بقرقـر وقرقـور
وتشرب من نيـدو صنعـت بلدهـا
حليـب انياقنـا صـار محـضـور
يخاف من حمـى العيـون ورمدهـا
قلت ايه يطرش البحر فيد صرصور
ما كل من بغـاء المعانـي صعدهـا
خافو من الله عالم الغيـب والجـور
هـذي عطايـاالله وربـي خلقـهـا
من فعلكم هذه الارض ماتنبت زهور
شفنا السحاب ولا شربنـا مطرهـا