الله يازيـنـك بـعـزّ انفعـالـك =مثل البخور ليا احترق فاح ريحـه
كنّك تقول بها العتب كيـف حالـك =ونفسي من معاتبك ماهي جريحـه
لمعاتبـك مرتـاح قـل مابـدالـك =خل يختلط ريحان صوتك وشيحـه
عاتب تـرى ماعنـدك الاّ حلالـك =قـل ماتريـده وبعبـاره صريحـه
غصن القصيد ليا زعلـت انثنالـك =كن الزعل بـك يستفـز القريحـه
كنّك تلبّـي مطلـب اللـي شكالـك =وتكسر حواجز صمت نفسك بصيحه
وكنّك تقول اللـي يـدور بخيالـك =وانا استمع وآخذ مع البال سيحـه
وحين اتسمّع فالجـواب وسؤالـك =اشوف منزلتـي بقلبـك صحيحـه
في وقتها اشعر بارتياح لوصالـك =وعن همّي اخرج في حياة فسيحـه
تعجبني ليـا ثـار فيـك انفعالـك =مثل البخور ليا احترق فاح ريحـه