بدون أسباب لاتنشد وش الأسباب يامنصور
هوى الإنسان وميوله يبا هالنفس مسروره
ذلول أهل الجمايل ماعليها يالسنافي قصور
تشيل الحمل وتزمه وعلى زمّته مشكوره
ليا شانت نوايا الخلق ليه تنادي الدكتور
اذا الدكتور في هذي المسائل فاقد ٍ دوره
أنا مااشره على آدم لو أخطى يا ولد معذور
ولو تخطي بعد حواء تراها حيل معذوره
ترى النبته تموت ليا غرسناها ف بطن البور
جهل وأعظم جهل لو هي من الأمطار ممطوره
يدوربنا الزمن وليا استدار يبيّن المستور
وعلى حسب الدواير ياوسيع العرف لك دوره
كذا طبعي اشوم ليا لقيت ان العلوم حدور
أجنب وأترك الشرهه هل الشرهات مخبوره
لابد الشمس ماتشرق على أهل الظلام بنور
ولابد الصدق في كشف الحقايق ينتشر نوره
على طاري شروق الشمس ذكرني زعيم الحور
هذاك اللي ملك فهد العباري وآسر شعوره
جميل ٍ لو يصنّف في جماله بأول الطابور
وغروره ما خلق أحد ٍ يضاهي طاغي غروره
عيونه ترمي قليبي واصير بهالشعر منثور
أغني له وأرتب له قصايد حب مغموره
يغار ولا يبي غيره بهالدنيا إلي جمهور
وانا شاعر عيونه لو يبي عاشقه جمهوره
دلع وليا حكى ينثر على عوج الضلوع زهور
ثقل لا من حضر يملى المكان ب باهي حضوره
أحبه وأنحكم قلبي ولا لي فالمحبه شور
وهو مثلي ترى محكوم ماتملك يده شوره