انا ضيف في منتداكم وشاعر ولكن لم تتعرض قصايدي للنقد وجيت اتطلع لنقدكم وارائكم واشوف انا شاعر والا اظن اني كذلك ودمتم بالف خير...
سبحان من بيده تصاريف الاقدار
الواحد المعبود رب الخلايــــق
دعيت باسمه والضماير على نار
والصدر من هم تغشاه ضايــق
ويوم(ن)ذكرته كن ماصاير صار
وامسيت من همي خلي ورايق
يارب عفوك وانت عالم بالاسرار
لا جابني يمك شهيد وسايــــق
اغفر ذنوب مالها عندي اعــــذار
واسالك يارحمن خضرالحدايق
العمر في عيني رحيل ومسفـــار
وياكم عيون في متاعه علايق
لكنّ فدروبه تهاويـــل واخطار
ماحدن تعداها بليا عوايـــــق
اكبر بلاها طعنة الجار للجار
واقلها ماحد(ن) لشيلته طايــق
سالت شيخ في الصعيبات له كار
عن صاحب للروح وافي وبايق
قال الزمن فضاح والرب ستار
وبين الحلا والمر ماخاب ذايق
لاتحكم اعلى الناس بقولة احرار
الين ما يبقى لعذلك طرايــــق
ولايظهر الرجال في غير الاسفار
لاطالت المده على كل تايق
ثم ارخص لخوته ماتملك اجبار
واتركه مابين الضلوع الغلايق
خله ليا بان الخطر درع وجدار
وعيش ماهمك لو العمر شايق
اما كذوب الهرج كثير الاعذار
لاتشتري له من حياتك دقايق
مايحفظ العشره ولايكتم اسرار
يقفي ولايحسب حساب اللحايق
في رفقته ذله وفي قربه العار
طبع الحقاره جايزله ولايق
نصايحٍ كانك تبي تتقي النار
في وقتنا اللي ممتلي بالحرايق
وصلاة ربي عد مافوقها دار
على النبيّ احمد شفيع الخلايق