ان كان جده غير حتى الثمد غير
والراس الابيض والخفق والسواسي
وان كان فيها ابحر وشاطي وتطوير
وبواخر ولنشات والها مراسي
حنا ترانا النا بروس العثامير
مدينة يجلا هواها العماسي
حقيقة ماهي سوالف واساطير
حقيقة مثل الجبال الرواسي
جو المدن ضجه وصجة مزامير
والبر جوه سجة ماتقاسي
ديره ماشوف ابها ناقه ولابعير
لو انها دره تصدع براسي
يالله عسى وبل الحيا والتباشير
يسقى التراب الي عليها يداسي
ديار ربعي والرجال المناعير
الي منازلهم تثور الحماسي
ربعي مفرقت الجموع الطوابير
بني رشيد مطوعت كل قاسي
هذا وانا ماصرت ضمن المشاهير
اللي مجالسهم كنب والكراسي
ياعونتي يالله ياعوير وصوير
ياكثرهم بالمختلف وبرواسي
يحقلي لواني اغتاض واغير
من شاعر المنقا وشعر البباسي
حط اله تلقيمه وفديو وتصوير
ونظاره ومزرع وجيب وتكاسي
وصوره معاه الطير عند المقادير
وقصيدته حزن وغرام ومآسي
وان قالها الله وانصفن المقادير
لاخذ بثار الشعر من كل خاسي
لاني لو اقف بين هاك الشواعير
صفيت ساحتهم وقويت باسي
وان كانها بالملعنه والدنانير
والله ماالبس لبس ماهم لباسي
اما اشتهر شهره مثل سالم الزير
والا لبو الشهره بليا مقاسي
وان كان جده غير ترى الثمد غير
ديرة هلي وديارربعي وناسي