[ذبحني غروركـ]

لا جيت ابنسى واتراجع واسامحـك
صاحن جروحي واشتكن لي طعونك

كلك خيانه قـول وشلـون ابمنحـك
وش موقفك من شخص دايم يخونـك

اكبر خطا.. لو جيت يمك اصالحـك
اول تحـول لاتغـرك .. إلحـونـك

اللي تقوله صح لو كنـت جارحـك
(مير) انت غارق للاسف في ظنونك

وصفك نسيته بس .. باقي ملامحـك
بنهيك وانهـي بالنهايـه .. جنونـك

ماتستحـق امـد كفـي واصافحـك
مثلك غلط عمري وابحيا .. بدونـك

لعبت دورك شاهـدات ٍ مسارحـك
خدعتني واظهـرت خافـي فنونـك

كنت اعتقد قلبي هو ابرز مطامحـك
اللي يبيع الناس .. لجلـه يصونـك

تعبت اسوق الشوق يمك واصارحك
اخلصت لك بالحب شوفت عيونـك

لكن خسارة صرت غاية مصالحـك
ياليتني ماجيـت لحظـه .. بكونـك

بالامس كنت بنشوة الحب .. امازحك
اخيـل برقـك واتحـرى امزونـك

واليوم من صفحة حياتـي ابمسحـك
هديت صرحك ثم طاحـت ركونـك

ولابي عيوني لو تصـورت تلمحـك
اعلنت موتك .. وانسجن لي كفونـك

وان جيت تطلب ترتجيني .. اسامحك
بهديك طعنه .. من بقايـا طعونـك

الموضوع الأصلي: لاجيت ابنسى واتراجع واسامحك!!! | | الكاتب: ذبحني غروركـ | | المصدر: شبكة بني عبس