[ذبحني غروركـ]

تعال ابرضي مرادك وارضي مرادي
. . . . . . . . سؤال صدك وصدي واضح ٍ حله

وشو له اسرح بوادي وانت في وادي
. . . . . . . . والكــل منّا عــزيز ويكره الـــذلة

هذا طريق السعادة والله الهادي
. . . . . . . . مافيه داعي نضيع ودربنا ندله

ادري تبيني اجيك وماتبي تنادي
. . . . . . . . مثلي وانا اضحك ودمعي دايم اهله

المشكلة اني شرابك وانت لي زادي
. . . . . . . . بس البلا إنّا نعقد حبال منحلـه

يكفي عنادك ويكفي مني عنادي
. . . . . . . . أوضاعنا سبة الإنكــــار مختلة

اترك كلام التحدي منهو البادي
. . . . . . . . الكل منّا على الثاني يبي الزلـة

توجعني وتقول : هجرك ثالث اعيادي
. . . . . . . . واكمام ثوبك من الهجران مبــتلة

نكذب نكابر نقول إن الوضَع عادي
. . . . . . . . ادري وتدري وكــل ٍ ميت بخله

أنا ادري انك بدوني تايه وغادي
. . . . . . . . وانا بدونك اذوق الــهم والعلة

ابخص بلادك ومثلي تبخص بلادي
. . . . . . . . مافيه داعي نضيع ودربنا ندله

الموضوع الأصلي: اكمام ثوبك من الهجران مبــتلة.. | | الكاتب: ذبحني غروركـ | | المصدر: شبكة بني عبس