ياوجودي كل مأصبحت من ليل طويل
لاوصلت لشف بالي ولا عيني غفت
وجد من حده زمانه على رجوى بخيل
العطش والجوع حاديه و الحال إضعفت
ماوراه إلا مساكين وأيتام ودخيل
هاقي فيه الهقاوي وجاله وأخلفت
مايفيد الجرح لاقيل صبرك ياعليل
والحلول إتضيع لامن دعواك إوقفت
صرت راعي حق لاكن ماعندي دليل
لين ماضاعت حقوقي وشمعاتي طفت
شلت ماشاله بليهان في يوم الرحيل
لاتيسر لي طريقي ولا أيامي صفت
شفت بالدنياء متاهات وأهوال تهيل
مثل ماشفت التفاهات بنفوس هفت
لاكن اللي في يدي مايسيله مسيل
والهقاوي طايحه و الحظوظ إستصلفت
يالله الخيره ويالله في صبر جميل
يبست يديه من الويل ورجولي حفت
ألاماني صارت أشباه شبه المستحيل
والحلوم اللي تحلمت بأولها أختفت
أتحاشى موقفي عن مواقيف الهزيل
دنيت نموت بآخر رجاها ما أنصفت
ياصغير السن ياللي تمسك بالشليل
واهنيك ماتعرف الليالي وش خفت
دالهن بالك بلا هم وقت ولا خليل
وأي شي نفسك إتحصله فيه إكتفت
والله إني بس أعاني وأنا صبري قليل
بس أجاوب نايح الورق وأحوالي سفت
لافقت الشي دورت له شي بديل
دنية بأحوال بعض الخلايق مارفت
كم عزيز بالرفاعه وصار أكبر ذليل
وكم ذليل عزه الوقت وأيامه دفت
. . . .
الشاعر ؟ بركه الخياري