[ذيبان الرشيدي]

أسعد الله أوقاتكم
بخيره والفرح والسعد والمسره

أما قصيداً .. يطلق الوجه لا قيل = والا عساني .. مانظمت القصيده

أخي
الشاعر العذب
كاتب الرشيدي

لا
إطاله
القصيده تتحدث

هب البراد .. وغرهدت راعبيه = وأفتلت ..جزلات القصيد المجدي
درهمتهن .. مثل البكار الهديه = عوص الركاب .. مجهزات الأشدي
دلت ومدت .. وأسحرت ناظريه = في خايع {ن} .. فيه النفل مجرهدي
ركايب لشيخ {ن} .. خشته البريه = لازيزمت .. بين العرب تستبدي
ميزتها .. من جوبها للثنيه = وأجهزتها .. وقت النهار المصدي
من خافق {ن} .. يفرح بجية خويه = له سجة {ن} .. قرناسها مستعدي
تنصا الذي .. جر اللحن سامريه = وأقبل كما حراً .. كفخ مستهدي
شاعر وجزلاته .. تمقنا نديه = حاولت أقدي .. من هجوسه وأهدي
يبغى يزينها .. ويقلب عليه = بالعون علمه .. ما يسر المودي
ياصاحب {ن}.. سقت البيوت المليه = وأظهرت للشعار .. مدك ومدي
أشرب فناجيل الشعر .. شاذليه = قرطع فناجيل{ن} .. وفت وسط يدي
وأقضب علوم {ن} .. لاتجلت عليه = أحدن يعليها .. والأخر يقدي
ماني بمن ثنى .. هروج {ن} خليه = ولاني بمن تمشي عليه .. وتعدي
الحر يفهم .. والهفيه هفيه = والشعر مداته .. تفك وتشدي
والذيب لامنه .. حدر للوطيه = ماغربله .. ضلع الضنك والتحدي
والملح .. وان شاشت بشوف ابرديه = عن ضافي المخضار .. لا ماتلدي
والعذر .. بين الناس طيب حليه = لامرني .. لا ما يروح متعدي
ومادام غيرك .. ماحظى بالحظيه = وأجتابها .. بالسيف جدك وجدي
قربلي خشيمك .. وصافح يديه = وخل الخيال .. بجزلتك يستمدي

دمت
بخيراً وستراً وعافية

الموضوع الأصلي: قربلي خشيمك ... رداً على الشاعر العذب كاتب ...& | | الكاتب: ذيبان الرشيدي | | المصدر: شبكة بني عبس