************************************************** *****************
بعد عدة أيام.....
اجتمعت الفتيات في الكليه عند الكافتريا وكانت نوره مفاجأت هذا اليوم.....كانت ندى تضحك على نكته قالتها نوف.
التفتت إلى نوره متسائله"نوره...كيف سارة؟!"
نوره"الحمد لله شفتها اليوم قبل أروح الكليه وكانت طبيعيه..أفطرت وكانت تسولف وكأن ما صار شي"
نوف"حسبي الله على زوجها...الحين من ياخذ الشينه شذى"
نوره"شذى كانت مخططه من زمان على تركي...وحاربت لين حصلت عليه"
نوف"والله ناس ما تستحي"
ندى"أكيد سارة الآن متمسكه بالطلاق"
نوره"طبعاً تركي خلاص انتهى من حياتها"
التفتت نوف إلى هند متسائله"هند وشعندك ساكته؟"
غمزت هند قائله"شوفوا شذى دخلت الكافتريا"
تطلعت الفتيات إلى شذى وصديقتها ريم..كان وجه شذى ملئ بالمساحيق بينما ريم كان وجهها أصفر متعب.
نوف"شوفوا المهرج..الظاهر ما فيه ماكياج بالدنيا ما جربته على وجهها اليوم"
قالت نوره بحنق"هذي ايش جابها اليوم؟!"
ندى"غريبه هي لسه عروس ما صار لها أربعة أيام"
نوف"شكله الأخ تركي مطنشها والا فيه أحد يترك الجمال سارة وياخذ الشيفه هند"
نوره"بالعكس...شوفي ضحكتها شاقه وجهها"
نوف"شوفي كيف تناظرنا بترفع"
قالت نوره بحنق"آه...قسم بالله لو اننا مو بالكليه كان أخليها تاكل من الطين لين تشبع"
قالت هند"بصراحه مالكم حق...البنت ما أجبرته انه يتزوجها"
نوره"وليش ترضى تتزوجه وهي تعرف ان سارة للحين على ذمته"
هند"تركي ما ينرفض"
نوره"هند لو ما أعرفك زين..كان أقول انك شبيهتها"
هند"يا ناس خلوا قلوبكم صافيه...المفروض نروح نبارك لها"
نوره"والله لو على قطع رقبتي"
نوف"هند انتي ماكله فول اليوم"
ندى"هند شكلها عقلت بعد ما تزوجت"
نوف"إلا انهبلت..وضربت فيوزات مخها"
تطلعت ندى إلى هند ثم قالت"هند شكل ابتسامتها اليوم غيروالله يكفينا شر هالابتسامه"
هند"حرام عليكِ ندو والله البراءه انخلقت كلها عشاني" قالت تلك الكلمات ثم أخرجت علبة مزخرفه من أسفل
الطاوله أمام أنظار صديقاتها المندهشات.
نوره"وااااو..هديه لي...ما توقعتك ذوق يا هنوده"
هند"تحلمين...انتي قدرك حلاوة مصاص..عصير الربيع...بطاط تسالي..أما الهدايا الكبيره خليها للكبار"
ضحكت نوف وندى بينما قالت نوره حانقه "وأنا أمجد فيك من سنين...أجل الهديه لمين؟!"
ابتسمت هند قائله"الهديه هذي لشذى الحلوه بمناسبة الزواج"
اتسعت عينا نوره ثم همست"شكلك انهبلتي"
غضنت ندى جبينها وقالت"هند...انتي ايش ناويه عليه؟!"
لم تنطق هند بكلمه وانما نهضت متجهه إلى حيث كانت شذى جالسه مع ريم..
تطلعت شذى إلى هند متسائله والتي كانت تقف حامله الهديه وقد علت وجهها إبتسامتها بريئه.
قالت شذى بجفاء "نعم؟!"
قالت هند ببراءه"الف مبروك...تصدقين إني فرحت لك مره"
قالت شذى بتهكم "غريبه...هذي هند أو أنا أحلم"
اكتفت هند بابتسامه وديه "أنا هند بشحمها ولحمها..وعشان أبرهن لك فرحتي هذي هديه متواضعه مني لكِ"
قالت شذى بارتياب "وأنا ايش اللي يأكد لي ان ما فيها متفجرات...بعد أنتي وشلتك الخايسه يتوقع منكم كل شي"
اتسعت عينا هند ببراءه"معقوله...للدرجه هذي تشكين فيني..أنا نسيت كل اللي صار..كان مجرد مراهقه ولعب
عيال وأنا الحين أفتح معك صفحه جديده"
تجاوزت نظرات شذى هند إلى حيث صديقاتها "والله ما أعتقد أنتي وشلة الشؤم"
قالت ريم بتكبر"أقول طنشيها هي وهديتها"
ابتسمت هند قائله"الله يسامحك...وبعدين العفو عند المقدره"
قالت شذى بارتياب"أوكي...رغم انه ما يشرفني..لكن كرمي الذاتي يخليني أقبل هديتك"
قالت هند"اذا كان في قلبك شك...ممكن تفتحين الهديه الحين"
اقتربت شذى من الهديه لكي تفتحها بينما اتجهت هند إلى مجموعتها لتجلس بارتياح على كرسيها...
نوره"غريبه شذى قبلت الهديه؟!"
قالت هند باعتداد"اف كورس...فيه أحد بالعالم يرفض لي طلب"
نوره"هنيده...شكل فيصل مسوي لك غسيل مخ"
هند"تراكِ ذبحتينا بأخوكِ...ما كأن بالعالم غيره...هو ليته يعرف يغسل سيارته"
ندى"ممكن نعرف ايش هي الهديه؟"
هند"لاطبعاً..أخاف اذا عرفتوا تتهاوشون عليها"
قالت نوف باهتمام"أكيد مجموعة عطورات"
ندى"أو تشكيله من الاكسسوارات"
وبينما هن يتحدثن تناها إلى سمعهن صراخ شذى.التفتن إليها فوجدن مجموعه من الضفادع القبيحه تتقافز من
الصندوق وتتعلق في قميص شذى وشعرها.كانت شذى تصرخ بهستيريا وتتوعد بينما ضحكت هند مع صديقاتها.
ندى"والله طلعتي ماانتي هينه يا هند"
قالت هند باعتداد"طبعا أنا دكتوره بالمقالب ...وتراي أعطي دروس مجانيه..للناس اللي أحبهم"
نوره"هههههههههه آها يا قلبي...لا مو معقوله...شوفوا شكلها"
نوف"هههههههه يا ليت معي جوال كامرى...والله انها تصير نكتة الموسم"
خرجت شذى هاربه من الكافتريا بينما اختفت الضفادع بين الاشجار وفي الممرات
في نفس الوقت الذي اختفت فيه الطالبات بسبب الهلع الذي أصابهن.ما عدا هند وصديقاتها.
هند"بهذي المناسبه السعيده العصير على حسابي"
نوره"وأنا علي الجاتوه"
ندى"هند انتي ما فكرتي بالعواقب"
ابتسمت هند قائله "يس..ولكل حادث حديث"
وما ان انهت جملتها حتى أتت احدى المشرفات..اقتربت من طاولتهن ثم قالت "هند وينها؟"
وقفت هند بكل هدوء وبراءه"أنا؟"
المشرفه"تعالي لمكتب العميده...الآن ضروري"
هند"ليش؟! عسى ما شر"
المشرفه"وتسوين نفسك بريئه؟ انتي روحي وبتعرفين"
هند"اوكي...بلحقك الحين"
المشرفه"لا تتأخرين" ثم خرجت مسرعه من الكافتريا.
نوف"ايش بتسوين الحين يا هند؟"
هزت هند كتفيها بلا مبالاه "أكيد بروح"
وقفت ندى قائله"أنا بروح معك"
نوره"وأنا بعد وذا صار لك شي راح نشترك فيه كلنا"
نوف"طبعاً..كلنا في خندق واحد"
هند" حشى داخلين حرب حنا....خليكم بعيد عن السالفه"
قلن جميعاً"مستحيل"
ابتسمت هند"كفو والله....أجل يالله بسرعه إلى ارض المعركه"
دخلت الفتيات إلى مكتب السكرتيره.قالت هند"لو سمحتي العميده موجوده؟"
تطلعت إليها السكرتيره بكبرياء وامتعاض"انتي هند؟!"
هند"نعم" ثم التفتت إلى نوره"وناااسه..صرت مشهوره ...عقبال مكتب الوزير يا رب"
لكزتها نوف قائله"احنا وين وانتي وين؟"
قالت لها السكرتيره باشمئزاز"انتي ما تعرفين عواقب اللي سويتيه"
هند"اللي يسمعك يقول اني حارقه الكليه على بكرة أبيها"
رفعت السكرتيره نظارتها متسائله"نعم؟ ايش تقولين"
هند"سلامتك...ممكن أدخل لمكتب العميده"
أشرت السكرتيره بيدها بلا مبالاه وعينيها على موجموعه من الأوراق "ادخلي والعميده الحين تجي"
دخلت هند وصديقاتها إلى المكتب.صفرت هند" تصدقون لي سنتين بالكليه..ما شفت مكتب العميد الا الحين"
وقفت نوره عند مكتب العميده ,نظرت حولها ثم قالت"شوفوا العز يا بنات"
نوف"خلاص أنا قررت اني أكمل تعليمي وأحصل على الدكتوراه"
ابتسمت ندى ثم قالت"وشعندك نزل عليكِ العلم مره وحده"
نوف"عشان أصير عميده ويصير عندي مكتب مثل كذا"
نوره"بلا مذاكره بلا هم..انا ما أصدق اخذ الشهاده الجامعيه عشان اقضي عمري أركض ورى شهادات ثانيه
انا بصراحه باختصر كل شي...راح أشتري لي مكتب في بيتي مثل هذا...وأرز روحي"
وضعت نوف يدها على خصرها وقالت باستهزاء"ومنو ان شاء الله اللي بيشتري لك مكتب طويل عريض مثل
هذا"
نوره"ماجد الله يخليه لي"
هند"الحمد لله والشكر...أنا نفسي أعرف أنا ليش مصاحبه ثنتين مهابيل مثلكم"
نوف"وانتي اللي سويتيه قبل شوي ما تسمينه اهبال"
ندى"خلاص انتي وياها...كل وحده منكم أهبل من الثانيه"
تطلعت هند إلى سله فيها حلويات ومجموعه من الشكولاته,مدت يدها وأخذت مجموعه ووضعتها في جيبها"
نوره"والله من الجرأه"
هند"ليش؟ هي ما حطت الحلاو الا عشان الواحد ياخذ"
نوف"الزوار والدكتورات بس مو الغلابا مثلنا"
هند" أجل عشان كلامكم هاه" ثم امتدت يدها إلى السله وأخذت مجموعه كبيره وضعتها في حقيبتها.
نوف"اذا كان فيه واحد بالعالم بارد...فهو هند"
نوره"الله يعينك يا أخوي"
فتح الباب من خلفهما ثم دخلت العميده.اتجهت إلى مكتبها وحين جلست سألت الفتيات.
العميده"من فيكم هند؟"
هند"أنا يا دكتوره"
تطلعت الدكتوره إلى الباقيات"وانتم من طلبكم؟"
ندى"حنا صديقاتها..ومافارقناها اليوم...وبصراحه تعجبنا من استدعائك"
العميده"هند...وصلني خبر انك دخلتي اليوم إلى معمل الاحياء وطلبتي من (أم علي) المسؤوله عن المعمل انها
تعطيك مجموعه من الضفادع بحجة ان الدكتوره سهام طالبتهم ...وبعدها أخذتيهم وأخفتي فيهم احدى الطالبات"
اتسعت عينا هند ببراءه"يا ساتر...كل هذا كذب...مو صحيح يا دكتوره"
نوره"نعم...حنا ما افترقنا عن بعض...والكلام هذا مو صحيح"
ابتسمت العميده قائله "وأنا قلت كذا...بنات مثلكم مجتهدات مستحيل يسوون شئ خطأ..
على العموم أنا استدعيت أم على وشذى والحين بيجون"
تطلعت الفتيات إلى هند والقلق يكسوا وجوههن بينما التزوم هند الصمت.
دخلت (ام علي) إلى مكتب العميده وكانت امرأه بدينة الجسم ذا شعر مجعد تكسو ملامحها لمحه من الجمال
والطيبه.
أم علي"السلام عليكم"
الجميع"وعليكم السلام"
العميده"هلا أم علي...ناظري للبنات قامك...من فيهم اللي طلبت منك الضفادع"
دققت أم علي النظر إليهن الواحده تلو الأخرى ثم تطلعت إلى العميده قائله "ولا وحده منهن"
تنفست ندى بارتياح بينما ابتسمت الأخريات.
العميده"متأكده يا أم علي؟...دققي زين"
أم علي"أنا متأكده..البنت اللي جتني اليوم كان شعرها أصفر تلبس نظاره وكانت تنورتها جينز والبلوزه كاروهات
وشكلها مختلف تماما عن البنات اللي قدامي"
التزمت العميده الصمت لبرهه ثم قالت"الظاهر ان فيه سوء تفاهم"
ترددت طرقات خفيفه على الباب ثم دخلت شذى مشعثة الشعر..نظرت إلى هند قائله"هذي يا عميده..جالبه
المصايب"
قالت هند ببراءه"استغفر الله...يا بنت لا تحذفي بلاك على الناس"
نوره"دكتوره...شذى تكره هند..ودائما تهددها...وفيه من يشهد على كذا"
قالت العميده بصوت بارد"المشكله يا شذى ان البنات في الكافتريا انكروا انهم شافوا هند عند طاولتك
..وأم علي بعد أنكرت ان هند جتها اليوم
.وعلى كذا انتي راح تكتبين تعهد واذا جيتي مره ثانيه بدعوى كاذبه راح يكون عقابك كبير"
قالت شذى باستنكار"لكن يا دكتوره؟!"
قاطعتها العميده"انتهى..وانتم حنا نتأسف منكم...ويالله على محاضراتكم"
خرجت الفتيات من غرفة العميده ضاحكات ...ووقفن في غرفت السكرتيره والتي لم يكن بها أحد.
ندى"انتي ايش سويتي بالضبط وايش قصة أم علي"
ابتسمت هند قائله"بعدين أقول لكم...الليله ان شاء الله اذا اجتمعنا في بيت نوف"
نوره"أي والله انا نسيت الحفله اليوم"
غمزت نوف قائله"وندى محضره لكم حلويات وكيك"
هند"تسلمي يا أحلى بنت بالكليه"
ندى"لكن انتم ما تحسون اننا ظلمنا شذى"
نوف"تستااااااااااااهل وعقبال خالتها الحيه"
نظرت هند حولها ثم قالت"بنات انتم ما تلاحظون ان السكرتيره مو موجوده"
ندى"تكفين يا هند لا تتهورين"
هند"أنا قاهرتني هي ونظارتها" ثم أمسكت بالقلم وخربشت على أوراقها..
قالت نوف باستنكار"يا الله..والله حرام بعدين راح تكتبهم مره ثانيه وتعب أناملها الرقيقه....كذا أفضل"
ثم مزقت نوف باقي الاوراق وهي تبتسم بشيطانيه.
...قالت ندى برعب"لاااااااااا انتم تجاوزتم حدكم"
نوره"تستاهل ما شفتوها كيف تكلمنا من فوق خشمها"
ندى"خلونا نطلع بسرعه قبل يجي أحد"
هربت الفتيات من غرفة العميده وهن يضحكن وكن يفكرن بشكل السكرتيره حين تشاهد الفوضى في مكتبها.
************************************************** *********************
نظر سلمان إلى ساعته وقد إزداد قلقه...فقد اتصل عليه صديقه( صالح) وطلب منه أن يمره ضروري بالاستراحه.
"غريبه صالح من زمان ما كلمني...ايش الشي الضروري"
وصل إلى الإستراحه...وحين دخل وجد مجموعه من الشباب مجتمعين في المجلس الكبير...حيا الجميع والذي
يعرف أغلبهم.
صالح"هلا باللي ما يتصل أو يسأل"
ابتسم سلمان قائلا"والله مشاغل يا أبو فهد"
صالح"تعال هنا...يالله حيه"
سلمان"الله يبارك فيك"
بعد أن شرب سلمان فنجانه الثالث سأل صالح "ايش هو الشي الضروري يا صالح..والله اني تركت أشغالي وجيتك
بسرعه"
ابتسم صالح قائلاً"مهو أنا اللي أبيك" ثم تطلع إلى الرجل الواقف بالقرب من الباب وقد ارتسمت ابتسامه خفيفه
على شفتيه.
أكمل صالح "سلطان هو اللي يبيك"
غضن سلمان جبينه ثم قال في نفسه"هذا ايش يبي وجه المصايب؟!"
************************************************** **************************
دخلت نوف إلى غرفة ندى"مرحبا ندو...عندك ماسكرا"
تطلعت إلى ندى ثم شهقت "من وين جبتي الجمال هذا؟...والله ما ألومك يا محمد لو استخفيت"
ضحكت ندى قائله"ايش رأيك؟"
كانت ندى ترتدي ولأول مره فستان موف قصير بكمين قصيرين وقد أسدلت شعرها الطويل خلف ظهرها.
كانت قد جملت وجهها بميك أب خفيف من اللون البنفسجي ودرجاته.
نوف"ما أقول الا الله يعينك يا أبو حميد"
قالت ندى مبتسمه برقه"وانتي بعد روووعه...كأنك ملكة جمال"
نظرت نوف إلى البنطال الاسود الواسع والبلوزه الفوشي بلا أكمام ...كانت حقاً باهرة الجمال.
نوف"ندو..أبشرك أبوي وأمي راحوا لخالتي أم ماجد وعاهم اختي..وسلمان أكيد بالعمل..وزياد عنده مباراه.."
ندى"حلو...على كذا بناخذ راحتنا"
نوف"أنا الحين ليش جايه؟!"
ابتسمت ندى ورفعت الماسكرا"عشان هذا"
أخذت نوف الماسكرا فقالت ندى"أنا بروح تحت أشوف التحضيرات بالمطبخ.
نوف"على فكره ..نوره اتصلت علي وتقول راح نروح بعد صلاة العشاء للسوق"
ندى"وليش ما نجلس هنا أفضل"
هزت نوف كتفيها قائله"ما أدري..لكن هذي كانت فكرة نهى..تقول نطلب من المطاعم هناك أفضل"
ندى"براحتهم"
نزلت ندى السلالم فصادفت دخول نوره,هند ونهى..قالت مبتهجه"هلا وغلا...ما شاء الله كلكم جيتم مع بعض"
ابتسمت نوره"اللي جابنا فيصل...ماجد عنده عمل اليوم"
ندى"روحوا للصاله..وأنا بشوف المطبخ"
بعد أن تأكدت ندى من التحضيرات ذهبت إلى الصاله فوجدت أن نوف قد سبقتها...
نوف"تعالي ندو...اسمعي حكاية هند"
هند" وأنا أروح لدرجي بالكليه...وكانت عندي باروكه ونظارات من العام لما اشتركت بالحفل..وطبعا كنت أحتفظ
بلباس اضافي عشان الطوارئ...المهم بعد ما تأكدت ان شذى داومت قررت تنفيذ خطتي"
نوره"يا بنت الـ( ) ولا قلتي لنا"
ابتسمت هند قائله"ما كان عندي وقت"
ندى"غريبه وكيف ما تعرفت عليك أم علي؟!"
هند"الماكياج الايام هذي يغير من شكل الانسان وبعدين لا تنسين الباروكه والنظارات"
نوره"وصندوق الهديه...من وين؟"
ابتسمت هند"من قسم الفنون"
نوف"والله انك داهيه"
جلبت الخادمات الحلوى,الكيك والمكسرات...وكانت الفتيات يتبادلن الاحاديث مسرورات..الا نهى التي كانت تنتظر
الفرصه لكي تحدث ندى وتبحث معها عن حل.
هند"شفتوا حلقة ميرنا وخليل البارح...قمة الروعه والرومنسيه"
تنهدت نوف"والا عيونه وابتسامته"
نوره"منو خليل اللي تتكلمون عنه"
هند"انتي من متى تدرين عن العالم؟...انتي برنامجك المفضل توم وجيري"
نوره"هندوه ووجع...اصلا خليل مو من زينه عشان تحطمن نفسكن عنده"
هند"أجل من المزيون"
قالت نوره بدلع"مجودي طبعاً"
هند"أقول انقلعي عن وجهي أنتي ورومنسيتك"
ندى" ليش يا هند؟ فعلا الممثل التركي أعطي أكثر من قدره..وأنا ولله الحمد ما أتابع مسلسلات مدبلجه"
اتسعت عينا هند"من جد؟!....أجل صفي جنب بنت عمك"
نوف"صدقيني ندى ما تشوف مسلسلات وتستهزئ من اللي يتابع خمسين حلقه كل يوم"
نوره"ندو خليكِ مثلي..أما بعض الناس فاضين"
ندى"أنا أتكلم عن واقع هذي مسلسات ذات عادات وتقاليد تختلف تماماً عن عاداتنا الاسلاميه"
هند"لكن يا ندى حنا نشوفهم للتسليه بس"
ندى" يمكن في بداية الأمر للتسليه لكن بعدين ممكن نطبع بطبائعهم"
نوره"نعم وتصير عاداتنا جزء من عاداتهم"
هند"تعرفين تسكرين فمك يا فيلسوفة زمانك"
نوره"هذا جزاي اللي أنورك"
ابتسمت هند قائله"أنا نوري موجود...ما يحتاج مساعدتك"
حينها رمتها نوره باحدى الوسائد أمام ضحك الجميع...ذهبت ندى إلى المطبخ لكي تحضر العصير ولحقتها نهى
تنحنحت نهى قائله"ندى فيه موضوع مهم...كنت من زمان نفسي أفاتحك فيه"
تطلعت إليها ندى بدهشه ثم قالت"تفضلي يا عمري..أنا أسمعك"
ترددت نهى ثم قالت"ما أبي أحد يسمعنا..ممكن نطلع للحديقه"
ندى"طبعاً"
بعد حوالي الساعه...نظرت هند حولها قائله"ما تلاحظون ان ندى ونهى لهم فتره مختفيات."
نوف"ايش رأيكم ندور عليهم ...ونطب عليهم فجأه"
نوره"يالله"
وقفت ندى مصدومه وهي ترتجف.."انتي مجنونه...أكيد"
قالت نهى هامسه"أنا آسفه..كنت طايشه..والحين هو يهددني"
صرخت ندى"الا يهددني أنا...تصوريني يا بنت عمي وترسلي صورتي لواحد تعرفتي عليه من خلال نت؟!"
نزلت دموع نهى ثم قالت"آسفه كنت غبيه..والحين أنا أبي الحل"
جلست ندى بهدوء على كرسيها وقلبها يرتجف"انتِ حطمتيني...أنا ايش اسوي الحين؟..وصورتي لعبه بيد واحد ما
يخاف الله"
نهى"ندى تكفين لا تزعلين مني"
ندى"الحين طاح الفاس بالراس..تعرفين رقم جواله..أو أي معلومه عنه؟"
نهى"أعرف ان اسمه سلطان بس"
ندى"حسبي الله على ابليسك...طيب لازم اتصل على الهيئه"
شهقت نهى قائله"وليش الهيئه؟"
ندى"هم اللي يعرفون يتصرفون مع الاشكال هذي"
قالت نهى برعب"لحظه..اكيد فيه حل ثاني"
ندى"هذا الأمر يخصني أنا الان..وأنا اللي راح أتصرف"
شغلت نهى فكرها بسرعه ثم قالت بابتسامه شيطانيه "طيب انتظري يومين..وأنا راح اجيب رقم جواله"
تطلعت إليها ندى بصمت ثم قالت "اوكي...حاولي لأنه هو الطريقه الوحيده للوصول له"
همست نهى"وما تخافين من الفضيحه؟!"
قالت ندى بشدة"الفضيحه لما تتبادل الجوالات صورتي"
صمتت نهى وهي تفكر بخطه مغايره وحين رسى فكرها على إحداها قالت برقه"أنا الحين ارتحت لما صارحتك
خلاص راح نستعين بالهيئه..الحين خلينا نستانس وبعدين ورانا سوق."
كانت ندى تود أن تقول شي مهم لنهى إلا أن ظهور الفتيات المفاجئ ألجم لسانها.
************************************************** *********************
كان سلمان يقبض بقوه بكلتا يديه وهو يقود سيارته بسرعه قسوى...كان في قمة غضبه وتعاسته.
"والله وطلعتي مني هينه يا ندى..ماسنجر وجوال ومقابلات وصور بعد..أجل محمد كان صادق لما نبهني منك"
سكت وهو يضرب بكلتا يديه"والله لو ما كنتي يتيمه..وماني خايف من الفضيحه لأشنقك بيدي..والرجال بكل وقاحه
يقول انه يبي يستر عليكِ ويتزوجك...سود الله وجهك"
سكت وهو يتذكر كلمات سلطان وقد أخذه في زاويه بعيداً عن الباقين"واذا ما كنت مصدق فهي مواعدتني الليله
الساعه تسع بالسوق عند المطاعم"
قالها بكل وقاحه غير عابئ بسلمان الذي كاد أن يتفجر دماغه.
لم يكن متأكداً من ندى ولكن الليله سيتثبت من الحقيقه..ثم عادت كلمات سلطان ترن في أذنه"أنا طلبتك
الليله عشان أطلبها منك رسمياً..لأننا اتفقنا على كل شي...وما باقي الا موافقتكم.."