لولا الثقة من بين الأصحاب ياذيب
كان المعرفة مالها اليوم قيمة
ياذيب كل الناس فيها عذاريب
محداً سلم من عيب وإلا نميمة
كلاً عطاه الله على قده الطيب
وحط الردى لأهل العقول السقيمة
لو صرت بين الناس وافي مواجيب
بعض البشر ياذيب مافيه شيمة
يصير لك عقده بكل المداريب
شكله شكل رجال لكن بهيمة
مالك معه حاجة ولا له مطاليب
بس الضعافه يعتبرها غنيمة
ودك بمعروفٍ معه يستر العيب
ولا ينفع المعروف جنب الشتيمة
يخطيك ظن وظن لا والله ايصيب
نوبً سليم ونوب ماهي سليمة
لكن تعال تشوف ذيك المراقيب
فيها من الماضي مواقف قديمة
فيها صفالي سيد كل الرعابيب
غرواً حلاياها بغيره يتيمة
فيها شربنا صافيات المشاريب
فيها نسينا هموم فينا مقيمة
لامن غنج لي بالرموش المهاديب
أصبح سراباً شاف له ظل غيمة
واليوم ماباقي ياكود المراكيب
ياذيب هذي الدار عقبه رميمة
من عقبها زادت علي اللواهيب
وأونست ناره عقب جنة نعيمه
غلاه ساكن بالظلوع المحاديب
من دونها ياذيب ماقوى العزيمة
لا تلومني لو شفت دمعي مساكيب
غريم حب وشاف دار الغريمة
ولولا الثقة من بين الأصحاب ياذيب
ماقلت لك عني سوالف قديمة