السلام عليكم ورحمة الله وبركاته
يا ذيب جر العوا لا يهمك الشاوي = أخذ السمينه ولا تعبر شواويها
ما أحدً براحمك لا من طحت متساوي = القوم ما ترحم اللي مرثعً فيها
في ليلةً لا هي بترحم ولا تاوي = شبيت نار الهجوس وقمت أصاليها
أخايل النجمة اللي نورها ضاوي = وعيوني النوم عيا لا يصافيها
فوحت هيل القصيد وعوده الجاوي = سالي عن الناس ما كني بأراضيها
ولمحت طيف الهنوف ولأني بغاوي = فزيت أغني لها مدري أغنيها
حوريتن لو رأها الشيخ طنطاوي = يمكن فتاويه تبلش مع فتاويها
في وصفها لخبط الشاعر مع الراوي = وأهل الحكاوي تخالف مع حكاويها
فكرت في خطفها لكن ماني قاوي = أخاف تزعل وأنا مقدر أراضيها
بعيونها الليل مدري ويش هو ناوي = سبحانه اللي بهالخلقه مسويها
الخصر ضميان لكن ردفها راوي = والليل الأظلم ليا نامت يغطيها
ويا ذيب جر العوا لا يهمك الشاوي = أخذ السمينه ولا تعبر شواويها
أخوكم/عــيســــــــــى بن راكـــــــب