براكين الشعر ثارت هلا به وابـرك الساعـات
ما دام الفكر به شحنـه يعبـر عـن قناعاتـي
أبنثر باقة حروفي ولا ادري هي تجـي وردات
أو إن الورد به شوكٍ على بعض البشـر ياتـي
تبرمج في خيالي شيٍّ ما ينفع معـه فورمـات
ولا نـي والله موقّـف ولا كاتـب بسكّـاتـي
أنا شاعر خيالي حر إلى مـن حانـت السجـات
اغوص البحر ما اهابه ولو موجه يجي عاتـي
قصيدي ما هو بحاجة حشيش يجلب الشطحات
قصيدي من فكر صافي يجيني حسب اشاراتي
يجيني واطلق عنانه على ما تحـدد الموجـات
مداه امّا بعيـدٍ أو قصيـر بحسـب موجاتـي
أنا طبعي كذا أضحك إلى من زانـت الهرجـات
كتابٍ منفتـح بعضـه لمـن يهـوى قراءاتـي
كتابٍ يعتقد منهو قرى شـيٍّ مـن الصفحـات
بأنه صـار متخصـص بأموري وبحكاياتـي
إلى من مدّ لي شخصٍ يمينـه يبشـر بمـدات
بصدق شعور ما عمري بكـذبٍ سقـت مدّاتـي
وانا ادري بالزمن تكثر صداقاتٍ من الهرجـات
فضاواتٍ واذا شـدّت صديـق الهـرج فلاتـي
واذا قفّوا بعض ناسٍ تراني ما انثـر العبـرات
مثل ماهـو بعقلـه حـرّ أنـا حـر بعلاقاتـي
واذا بعض البشر قلّب عليـه موجـة النيّـات
يجيني مـرّه مصيّـف ومـراتٍ يجـي شاتـي
مادام انه بـلا ذنـبٍ يكـوح حولـي العجـات
ألا يـا تابـعٍ شكـك تـرى ماهـي بعاداتـي
أنا أكبر ترى أكبر مـن علـومٍ بهـا هـذرات
هروج ٍ مالها داعي تـرى ماهـي بطموحاتـي
واذا هالسوق لا بدّه يلغّم بأرخـض السلعـات
أنا سوقي تـرى صافـي وانقيهـا بضاعاتـي