أرجوك حبيني على قد ما ابغيك
ملء السما والارض لبّّي ندائي
عينك في عيني شوفي شكثر تغليك
لو رمشها ينطق تحسي احتوائي
قلبي في كفك مدري ان كان يكفيك
يكفيك ولا جيت كلي فدائي
لا تحسبينه قول شاعر وتكتيك
لكن اعبر عن شعور انتمائي
وانا انتمي لك واعتبر كل ما فيك
ايمان اكبر به ويكبر عطائي
ما اقول احبك لكن اقول اشريك
حتى اذا كان الثمن كبريائي
من هذي لهذي تحت طوع اياديك
وشلون ما تبغين شكلي فضائي
تدرين ودي هناك للبدر اوديك
دايم اشوفك بدر يضوي سمائي
وتدرين وشهوله على الخلق ابديك
بديتك لأنك لمحتي ضيائي
وتدرين يا كل الغلا وش اسميك
ودي اقوله بس يغلب حيائي
مشكلتي من قبل انجبر في معانيك
انسان في حالة خجل وانطوائي
ويبدو لي ضعت بأولك قبل تاليك
وشلون ما اضيع وغرامك فجائي
ظميانك بقوه عسى الله يخليك
خليني أرمي في قليبك دلائي
صوره تمر بخاطري جعلها تجيك
ودي انا انتي نشكل ثنائي
في الحب وانتي تعزفيني واغنيك
ويرقص ردائك ويتمايل ردائي
يا حبي لعيونك وجيدك وخديك
ويا شيب حالي من شعر كستنائي
خصرك نحيل وزاد هالنحل ردفيك
يسعد مسى خصرك ويسعد بلائي
يعني ملكتي خلق واخلاق تحييك
وان كان ما جتني ابعلن رثائي
واصيح في قبري على قد ما ابكيك
تكفين هلي الدمع كله ورائي